TAMBWE AFIKIA MABAO YA MSUVA MSIMU ULIOPITA, AMPITA KIIZA WA SIMBA

Pamoja na kuisaidia Yanga kurejea kileleni, Amissi Tambwe amefanikiwa kumpita Hamisi Kiiza wa Simba.

Kiiza alikuwa kileleni akiwa na mabao 16 wakati Tambwe akiwa na 15. Lakini leo amefunga mawili na kuiwezesha Yanga kuitwanga African Sports kwa mabao 5-0, huku yeye akifikisha 17.

Wakati anampita Kiiza kwa bao moja, Tambwe raia wa Burundi amefanikiwa kuuwa ndege wawili kwa jiwe moja baada ya kufikisha mabao 17 ya kufunga ambayo alifunga Simon Msuva msimu uliopita.

Msuva alifunga mabao hayo 17 na kuchukua kiatu cha Mfungaji Bora wa Ligi Kuu Bara huku, Tambwe aliyekuwa ametokea Simba akiwa na bao moja akimaliza msimu akiwa na mabao 14 katika nafasi ya pili. Kabla msimu mmoja akiwa Simba, alikuwa ndiye mfungaji bora baada ya kupachika mabao 19.