MANCHESTER UNITED INA NAFASI KUBWA KUREJEA TOP FOUR PREMIER LEAGUE

Na Saleh Ally

UNAWEZA kusema bila ya woga kuwa kikosi cha Manchester United sasa kimekamata kasi na taratibu wachezaji wengi wanaanza kuelewa Kocha Jose Mourinho anataka nini.

‘Chemistry’ ya Mourinho inaanza kushika kasi, kwamba wachezaji wanaelewa na hii inatoa mwanya kwa kikosi hicho kuwa na nafasi ya kuingia kwenye nafasi nne za juu mwishoni mwa msimu.

Ingawa wengi wamekuwa wakiibeza Manchester United kama timu ambayo haina nafasi nzuri lakini inavyokwenda sasa, baada ya mechi sita huenda ikawa imevuka na kuingia ndani ya nne bora.

Baada ya mechi 20, Man United sasa iko katika nafasi ya sita ikiwa na pointi 39, Arsenal nafasi ya tano na pointi 41, inafuatia Man City na pointi 42 kama ilivyo kwa Tottenham katika nafasi ya tatu baada ya juzi kuibutua Chelsea kwa mabao 2-0.

Ukiangalia hapa, timu zote hizo zimening’inia karibu kabisa na Man United ambayo inakwenda kwa mwendo wa juu zaidi kuliko timu nyingine.

Ushahidi wa hilo uko hivi; katika mechi sita zilizopita Man United imeshinda zote. Arsenal imeshinda tatu, sare moja na kupoteza mbili, Man City imepoteza mbili na kushinda nne, Tottenham imeshinda tano na kupoteza moja.

Mechi dhidi ya Liverpool, itakuwa ni mtihani sahihi kuamua Man United ikae wapi. Kama itashinda, hatari kubwa kwa Arsenal na Man City kwa kuwa kuna kila sababu ya Man United kuwafikia.

Kigezo kingine kinaonyesha Man United kutokana na mfumo wa Mourinho, vigumu kufungwa mabao mengi ambalo ni jambo linalotengeneza uimara wa timu. Katika mechi 20, imefungwa mabao 19, Arsenal na Man City kila moja imefungwa 22 na Tottenham sasa ndiyo ina safu ngumu ya ulinzi ikiwa imefungwa mabao 14 tu.

Angalia katika mechi zake sita zilizopita, Man United imefungwa mabao matatu tu huku ikiwa imefunga 12. Hii inakuonyesha kuwa kuna kitu kimebadilika na kama haitapoteza mechi yake ya saba, basi kuizuia kuingia ndani ya Top Four itakuwa vigumu.

Mwendo wa United unaonyesha namna hali ya kujiamini ya kikosi hicho inavyozidi kuimarika ambalo ni jambo linaloweza kuongeza morali na kuwafanya wachezaji kutamani mafanikio hasa ikizingatiwa ina kikosi chenye wachezaji wengi waliowahi kutwaa makombe wakiwa Man United au katika timu nyingine.

Mwendo wa Arsenal na Man City, kidogo umekuwa hauna uhakika na wakati mwingine ni wa kuyumba. Hivyo hofu inakuwa kuu zaidi kuliko Man United inayozidi kuongeza hali ya kujiamini na kupanda kwa morali.

Mechi dhidi ya Liverpool itakuwa mwamuzi mkuu kwa Man United, kwamba wakati wa kurejea kwenye nafasi nne za juu kwenye msimamo wa ligi kuu ‘Top Four’ umewadia. Kama itashindwa, bado nafasi yake haitakuwa imetoweka, badala yake inawezekana kabisa lakini itakuwa imechelewa.

Lakini kama itaifunga Liverpool, Arsenal na Man City zitakuwa timu za kwanza kukaa mkao wa kula na kuipisha Man United kurejea ndani ya Top Four.

MATOKEO MECHI 6 ZILIZOPITA

West Ham 0 -2 Man United

Man United 2- 1 Middlesbrough

Man United 3 -1 Sunderland

West Bromwich 0- 2 Man United

Crystal Palace 1- 2 Man United

Man United 1- 0 Tottenham

MECHI 6 ZIJAZO ZA MAN UNITED

Man United vs Liverpool

Stoke vs  Man United

Man United vs Hull City

Leicester City vs Man United

Man United vs Watford

Man United vs Man City