KUENDELEA KUOMBA YANGA ISIFUZU MAKUNDI NI KUONYESHA USHABIKI BILA KUELEWA MAANA YA KUSHABIKIA

NA SALEH ALLY

NINAAMINI utakuwa umewahi kusikia ule msemo maarufu kwamba amekula chumvi nyingi. Maana yake sasa ni mtu aliyeishi kwa muda mrefu au mwenye umri mkubwa.

Dhana ya msemo haiendi katika maana ya mapokezi ambayo huwa amekula chumvi nyingi, haraka anayepokea hufikiri mhusika, amebwia au kumeza chumvi nyingi na huenda atakuwa katika wakati mgumu au inawezekana ni mtu wa kumshangaa, kwa nini ale chumvi nyingi.

Kula chumvi nyingi, ni kuishi kwingi ambako ndiyo kuona mengi. Kila unapoona mengi basi lazima utajifunza mengi ingawa uwezo wa kujifunza unatokana na mhusika, inawezekana akawa kaishi muda mrefu asijifunze mengi sana kama aliyeishi muda mfupi au akajifunza lakini asiwe na uwezo wa kuyafanyia kazi kwa uhakika.

Inawezekana nimeanzia mbali kidogo, lakini ninapotaka kulenga ni kuhusiana na wawakilishi pekee wa Tanzania katika michuano ya kimataifa ambao ni Yanga, hawa ndiyo mabingwa wa Tanzania.

Yanga watakuwa kazini keshokutwa, kumalizia ngwe ya pili ya michuano ya Kombe la Shirikisho dhidi ya Wolaitta Dicha ya Ethiopia na kama watafuzu, basi watakuwa wameingia hatua ya makundi.

Hili ni jambo ambalo wadau wanaopenda michezo na wanaoipenda nchi yao ya Tanzania watakuwa wanalisubiria kwa hamu kubwa hasa kuiona Yanga ikifuzu na kuingia katika hatua ya makundi.

Ikifuzu Yanga, sidhani kama itakuwa ni faida ya furaha pekee au faida kwa mashabiki wa Yanga, badala yake ni kwa wapenda mpira wa Tanzania lakini hata Serikali ya Tanzania pia.

Kama Yanga itafuzu, timu itakazopangiwa nazo, zote zitakuja Tanzania na kila zitakapokuwa nchini zitaingiza fedha katika sehemu mbalimbali. Mfano hoteli, hazitajali mmiliki ni Yanga au Simba.

Lakini wachezaji na viongozi wao watanunua vitu mbalimbali, hawa pia hawatajali kuhusiana na anayewauzia ni Yanga au Simba. Hivyo ujio wa zile timu itakuwa ni biashara.

Mbali na hivyo, burudani itakuwa ni kubwa sana. Hata kwa wale ambao watakuwa wanataka Yanga ifungwe, watapata nafasi ya kuburudika na kwenda uwanjani kwa namna wanayotaka.

Kumbuka, runinga zitaingiza fedha kwa kurusha matangazo ya mechi hizo na zenyewe zitailipa Yanga na tunajua fedha ya Yanga wakilipwa wachezaji na benchi la ufundi nao hutoa kwa ajili ya kupata vitu mbalimbali ili kuendesha maisha yao na haijawahi kuwa wanaangalia anayewauzia ni Yanga au Simba.

Yanga watapewa mamilioni ya fedha kwa kufuzu, fedha hizo pia zitatumika hapa nyumbani na kitaalamu zitaingia katika mzunguko wa fedha wa hapa nyumbani. Bila ubishi, zitakuwa na faida kwa wananchi wa Tanzania bila ya kujali wanapenda mpira au la, ni Yanga au Simba.

Kuna kamsemo kameanzishwa hivi karibuni, binafsi ninauona ni msemo wa kijinga sana na wanaopenda kuutumia si watu wanaojitafakari na wakati mwingine huwa naamini ni wavivu kujifunza mambo mapya kwa kuwa dunia inakwenda kwa kasi kubwa sana na inawaacha.

Wanasema: “Haki ya shabiki ni kushangilia au kuzomea”, hii ni sawa na kumfanya kila shabiki anafanana na mwingine au kuamini mashabiki ni watu wajinga sana, hivyo wakiwa uwanjani wanaweza kushangilia na kuzomea tu.

Shabiki anaburudika, shabiki anajifunza, shabiki anasaidia, shabiki anaweza kugundua jambo kupitia kile anachokiona uwanjani na kudadavua vitu na baadaye akawa mtoa maoni anayeweza kusaidia mabadiliko. Kwenda kushangilia na kuzomea ni jambo moja tu, lijumuishe liite kushangilia, maana kila mmoja ana aina yake lakini ni sehemu ndogo sana ya maana ya kuwa shabiki.

Wewe si shabiki wa Yanga, lakini kumbuka Yanga inatokea Ethiopia, wachezaji wao watakuwa ugenini kuipigania klabu yao iliyobeba jina la nchi yetu, badilika na ondokana na hao wenye haki ya kuzomea na kushangilia tu, tafakari nje ya boksi.