MZUNGU WA SIMBA KUANZA KUTESTI MITAMBO LEO LIGI KUU BARA

KOCHA mpya wa Singida United, Mserbia Dragan Popadic amepewa mtihani mzito wa kufanikisha kupata matokeo chanya kwa kushirikiana na Dusan Momcilovic ambaye ni Kocha Msaidizi ambao waliwahi kuifundisha Simba, kazi yao ya kwanza wakiwa Singida ni leo.

Kocha huyo ambaye kazi yake kubwa ni kufanya mabadiliko ya kikosi kupata matokeo chanya amepewa kandarasi ya miezi sita akichukua nafasi ya Hemed Morroco atakuwa akimenyana na Mbao Uwanja wa CCM Kirumba.

Katibu Mkuu wa Singida United, Festo Sanga amesema wanaamini uwezo wa kocha huyo atawasaidia kuweza kurejea kwenye ubora wao.

"Hali yetu kwa msimu huu haijawa ya kuridhisha na tumeamua kufanya mabadiliko kwenye benchi la ufundi, kazi yake kubwa ni kubadilisha mwenendo wa soka na kufanya turejee kwenye ushindani.

"Tunatambua tunashiriki mashindano mengi na tunahitaji kufanya vizuri kwenye michuanohiyo kama FA ambayo msimu uliopita tulifika fainali,tunashiriki SportPesa Cup pamoja na Ligi Kuu tunaamini kutakuwa na mabadiliko," alisema.

Singida United watakuwa mzigoni leo wakicheza na Mbao FC ambao ni mchezo wao wa kwanza huku macho na mashabiki wa Singida United ni kwa mzungu huyo kuona ataanza na gia gani.