KAMA NI MUUNGWANA, STEVE NYERERE UWAOMBE RADHI MASHABIKI SIMBA ULIOWADHIHAKI

NA SALEH ALLY

TANGU timu ya taifa, Taifa Stars ifanikiwe kushinda nafasi ya kucheza katika Kombe la Mataifa Afrika (Afcon), kwa mara ya pili, kumekuwa na muunganiko mkubwa wa Watanzania kupitia kila nyanja na muunganiko mkuu ukabaki kwenye michezo na hasa soka.

Kama unakumbuka, wasanii wa muziki, uigizaji nao walishiriki katika hamasa na ndio maana unaona muunganiko wa wapenda michezo na soka, wale wa burudani ukafanya Uwanja wa Taifa ushindwe kuhimiliki vishindo baada ya watu kukosa nafasi siku mechi ikipigwa.

Muunganiko huu, umefanya mchezo wa soka uendelee kuwa gumzo wakati Tanzania ikielekeza tena macho yake katika mechi ya Ligi ya Mabingwa Afrika hatua ya robo fainali wakati Simba inakwenda kuivaa TP Mazembe kesho Jumamosi.

Gumzo la mechi hiyo nalo limekuwa kubwa, kila upande ukionyesha nia ya kufanya vema, lakini muigizaji Steven Mengere anaonekana kuchafua hali ya hewa.

Siku chache zilizopita Mengere maarufu kama Steve Nyerere alikuwa akihojiwa na kituo kimoja cha runinga ya mtandaoni. Alizungumza mambo kadhaa kuhusiana na soka lakini kuhusu Msemaji wa Klabu ya Simba, Haji Manara.

Steve Nyerere hakuishia hapo, alisonga zaidi hadi kwa mashabiki wa Simba ambao hakika aliwakosea heshima, jambo ambalo hatupaswi kuacha lipite hivi maana litakuwa funzo linalotuzuia kukosea kwa mara nyingine.

Alieleza jambo zuri, kwamba atawaunga mkono Simba dhidi ya TP Mazembe na watashirikiana kuhakikisha wanashinda licha ya kwamba yeye si Simba. Hili ni jambo zuri kwa kuwa zaidi anaonyesha ni mzalendo.

Maneno haya ya Steve Nyerere yanaweza kubaki kuwa mfano mzuri hata hapo baadaye na kuonyesha kwamba alikuwa tayari kuishangilia Simba wakati yeye si Simba lakini ni kwa sababu ya uzalendo, hivyo wasio wazalendo wabadilike.

Baada ya hapo, Steve Nyerere aliulizwa kuhusiana na Manara, alichokisema kuhusiana na Manara kuwa ni mtu wa hovyo kwangu naona si kitu kibaya kwa kuwa zaidi ni utani wao ambao naujua unaendelea mara kwa mara kwa kuwa ni maswahiba.

Alichokosea ni pale alipotumbukia katika suala la mashabiki akiwazungumzia wale wa Yanga na Simba. Baadaye akasema anajua Watanzania idadi yao ni milioni 57 (hatujui alikoitoa). Akasema mashabiki wa Yanga wako milioni 39, lakini Simba wako milioni 3.4 na kati ya hao mashabiki wa Simba, mashabiki milioni 2.1 ni Waarabu.

Hii maana yake nini, Waarabu si Watanzania, hawapaswi kuwa mashabiki? Timu yenye mashabiki wa aina hiyo si ya Tanzania? Hakika ni jambo baya sana kuzungumzwa na mtu anayejitambua na hasa kwa mtu kama yeye Steve Nyerere ambaye anaonekana ni kama kiongozi na ameshiriki kwenye uongozi hadi wa Bongo Movie.

Maana yake, Waarabu si watu? Hawana haki ya kushangilia mpira? Wakiwa katika timu wanapaswa kugawanywa kwa idadi yao? Kinachosikitisha zaidi, maneno ya kibaguzi anayoyatoa, yalipigwa vita sana mwanzoni na Mwalimu Julius Nyerere ambaye yeye sasa anatumia jina lake bila ya kibali.

Huenda hili watu wengi wameliona ni kama jambo la kawaida sana, lakini Steve Nyerere anapaswa kuamka na wengine muangalie ujinga huu usije ukarudia wakati mwingine, ni jambo baya sana kurejesha ubaguzi na tena michezoni.

Michezo inaunganisha watu, inawafanya wengi wajisikie kuwa pamoja. Hivyo si sahihi kuanza kuzungumza maneno makali na mabaya kwa kigezo cha utani, yaani alikuwa akimtania Manara. Vema kuangalia wakati wa utani ni wapi au kipindi gani.

Kiungwana Steve Nyerere kama anaamini uungwana ni vitendo na uanadamu bora basi anapaswa kuwaomba radhi wale ambao anaamini ni Waarabu aliokuwa akiwataja.

Pia nimsisitize licha ya kwamba ni rafiki yangu na tunaheshimiana, lazima awe makini na maneno anayozungumza maana mbeleni anaweza kukwama katika ndoto anazotaka kuzitimiza kwa watu kumkumbusha maneno au matendo ya kijinga aliyoyafanya kabla.