ALLIANCE WAWEKA REKODI YA KADI NYENDU VPL

TIMU ya Alliance FC imeweka rekodi ya kuwa timu ya kwanza kuonyeshwa kadi nyekundu za moja kwa moja mbili ndani ya msimu huu wa Ligi Kuu Tanzania Bara inayodhaminiwa na Vodacom (VPL) mwaka 2019/20 kwenye mchezo mmoja.

Kwenye mchezo uliochezwa Juzi dhidi ya Mbeya City uwanja wa Nyamagana nahodha wa Alliance FC Israel Patrick alionyeshwa kadi nyekundu ya moja kwa moja dakika ya 52 kwa kosa la kumdhalilisha mchezaji wa Mbeya City licha ya mwamuzi kupuliza kipyenga.

Pia dakika ya 71 John Mwanda mlinda mlango wa Alliance  alionyeshwa kadi nyekundu ya moja kwa moja kwa kosa la kumchezea rafu isiyo ya lazima mchezaji wa Mbeya City mara mbili licha ya filimbi kupulizwa.

Iliwalazimu Alliance kumbadilisha mchezaji Siraj Juma ambaye ni mchezaji wa ndani kuvaa gloves za Mwanda kutokana na timu yake kumaliza idadi ya wachezaji wa mabadiliko ndani ya uwanja ambao ni watatu.

Licha ya Alliance kucheza pungufu kwa muda wa dakika 19 kwenye uwanja wa Nyamagana, Mbeya City ilishindwa kutikisa nyavu za Juma ambaye alipangua mashuti matatu akiwa langoni na kufanya mchezo kukamilika kwa sare ya 0-0.