CCM KIRUMBA PAMOTO KWA AZAM FC, KAZI NI MOJA LEO

AZAM FC leo ina kazi kubwa mbele ya Mbao FC kuvunja mwiko wa kushindwa kupata pointi tatu mbele ya Mbao FC uwanja wa CCM Kirumba kwa misimu mitatu mfululizo.

Azam FC iliyo chini ya kocha mkuu, Arstica Cioaba raia wa Romania inamtegemea mshambuliaji wao Donald Ngoma na Obrey Chirwa kuvunja mwiko huo wakati timu hizo zitakapomenyana.

Akizungumza na Saleh Jembe, Abdulkarim Amin ‘Popat’ ambaye ni mtendaji mkuu wa Azam FC  amesema kuwa mechi zote ni muhimu kwa timu kupata ushindi huku kazi ya washambuliaji ikiwa ni kufunga tu.

“Tunakazi kubwa msimu huu na kila mchezaji ana kazi ya kufanya kuanzia kwa mabeki mpaka washambuliaji ikiwa ni pamoja na Ngoma na Chirwa wanatambua majukumu yao ya kufanya ndani ya uwanja.

“Morali kwa wachezaji ni kubwa na tunachohitaji ni kuona tunapata pointi tatu muhimu kisha hayo mengine yatafuata kwani ligi ni ngumu na kila timu inahitaji ushindi,” amesema.

 Azam FC kwenye mechi sita ambazo imecheza na Mbao imeshinda tatu pekee na zote uwanja wao wa nyumbani Chamazi ilipokuwa CCM Kirumba imepoteza mechi moja na sare mbili.