SINGIDA UNITED YAZITAKA POINTI SITA ZA NJYANDA YA JUU KUSINI, LEO KAZINI

UONGOZI wa Singida United umesema kuwa kwa sasa upo tayari kurejea kwenye mapambano baada ya kuwa chimbo kwa muda wa wiki moja kutokana na ligi kusimama.

Singida United iliyo chini ya kocha mkuu Ramadhan Nswazurimo imeanza kwa mwendo wa kusuasua msimu huu ikiwa haijaambulia ushindi hata mechi moja kati ya 11 ambazo imecheza mpaka sasa.

Akizungumza na Saleh Jembe, Ofisa habari wa Singida United, Cales Katemana amesema kuwa wamekuwa na mwendo mbovu jambo lililowafanya watulie kutafuta dawa ya matatizo yao.

“Ukweli unaonekana kwani hatujawa na mwenendo mzuri kwenye ligi mpaka sasa tunawaomba mashabiki wasahau ya nyuma kwa sasa tunaanza upya kufanya kweli.

“Tuna mechi mbili nyanda za juu kusini tutapambana kupata pointi sita ambazo zitaturejesha kwenye ushindani ambao tunauhitaji, tutaanza na Mbeya City Jumamosi kisha Tanzania Prisons Novemba 25,” amesema Catemana. 

Singida United ipo nafasi ya 20 imejikusanyia pointi nne imelazimisha sare nne na kupoteza jumla ya mechi saba na imefungwa mabao 15.