CHUNGU NA TAMU ZA AZAM FC YA CIOBA NDANI YA DAKIKA 270

ARSTICA Cioba, Kocha Mkuu wa Azam FC raia wa Romania ameonja chungu na tamu ya Ligi Kuu Bara msimu wa 2019/20 kwa kupata ladha ya matokeo yote matatu ya mpira ndani ya dakika 270 kwenye mechi tatu ambazo amekaa benchi kwa kufungwa kupata sare na kushinda.

Cioaba amepewa kandarasi ya mwaka mmoja kuinoa Azam FC iliyokuwa chini ya Etienne Ndayiragije ambaye kwa sasa ni Kocha Mkuu wa timu ya Taifa ya Tanzania, Taifa Stars alianza kupokea kichapo cha bao 1-0 uwanja wa Mabatini alipocheza na Ruvu Shooting ya Masau Bwire.

Kabla hajakaa sawa alibanwa mbavu na Kagera Sugar ya Mecky Maxime kwenye mchezo uliochezwa uwanja wa Azam Complex kwa kupata sare ya bila kufungana kabla ya kuonja ladha ya ushindi mbele ya Biashara United kwa ushindi wa mabao 2-1 uwanja wa Azam Complex.

Akizungumza na Saleh Jembe, Ofisa Mtendaji Mkuu wa Azam FC, Abdulkarim Amin ‘Popat’ amesema kuwa kikubwa ambacho wanakihitaji kwa sasa ni ushindi kutokana na kuwa na kikosi imara ambacho kinaushindani mkubwa.

“Tuna kikosi kipana na chenye wachezaji wenye uzoefu kikubwa ambacho tunakihitaji ni ushindi kwa mechi zetu zilizobaki na hatupaswi kuwa na kiburi kwa ushindi ambao tumepata hivyo mashabiki waendelee kutupa sapoti kwani kazi bado inaendelea,” amesema Popat.

Ushindi huo unaifanya Azam FC ifikishe jumla ya 13 baada ya kucheza mechi 7 ikiwa imeshinda nne imetoa sare moja na kupoteza mechi mbili ndani ya ligi kuu msimu huu ipo nafasi ya 11.