WACHEZAJI WA COASTAL UNION KUMBE MUDA MWINGINE WANAZINGUA KINOMA

JUMA Mgunda, Kocha Mkuu wa Coastal Union amesema kuwa kuna baadhi ya mechi wachezaji wake wamekuwa wakicheza chini ya kiwango jambo ambalo linawaweka kwenye nafasi mbovu kwenye ushindani wa ligi.

Coastal Union ya Tanga imecheza jumla ya mechi 10 ikiwa imeshinda mechi tatu pekee na kutoa sare mechi mbili huku ikiambulia vichapo mechi tano msimu huu zinazoipa pointi 11 nafasi ya 13 kwenye msimamo.

 Mgunda amesema kuwa ana kila sababu za kuwapongeza wachezaji wake kwa namna wanavyopambana uwanjani ila kuna wakati huwa hawachezi vile anavyotarajia jambo ambalo linawatoa kwenye reli ya ushindani.

“Kuna mechi nyingi ambazo tumecheza na kupoteza ukitazama namna ambavyo wachezaji wanacheza unapata picha kwamba hawajacheza kwenye kiwango chao cha siku zote jambo ambalo linatufanya tunakosa matokeo.

“Ila kushindwa mara moja haina maana kwamba ndio mwisho wa mapambano hapana tunajipanga na kufanyia kazi makosa yetu nina amini tutakuwa sawa kwani makosa ni sehemu ya mchezo kikubwa ni kuyapunguza ili yasitokee kwa kuongeza umakini,” amesema.