SHEVA AJIPA KAZI NGUMU LEO NDANI YA SIMBA WAKATI IKIIVAA MBEYA CITY

MIRAJ Athuman ‘Sheva’ mshambuliaji wa Simba amejipa kazi ngumu leo mbele ya Mbeya City kwa kusema kuwa kama atashindwa kufunga bao akipata nafasi basi itampasa atengeneza nafasi ya bao kwa mchezaji wake bila kujali nani atafunga.

Simba leo itakuwa kazini ikimenyana na Mbeya City iliyo chini ya Kocha Mkuu Juma Mwambusi uwanja wa Uhuru ambaye ana kumbukumbu ya kufutiwa kibarua chake na Simba msimu uliopita wakati akiinoa Azam FC  baada ya kupoteza mchezo uwanja wa Taifa kwa kufungwa mabao 3-1.

Akizungumza na Saleh Jembe, Sheva amesema kuwa kwa sasa ligi imezidi kuwa ngumu kutokana na ushindani uliopo jambo ambalo linawafanya nao wajipe kazi ngumu ya kufanya ndani ya uwanja.

“Tulipoteza mchezo wetu uliopita dhidi ya Mwadui tukiwa ugenini hilo tumeshasahau tunajipanga kutafuta ushindi kwenye mchezo wetu mwingine, kilichobaki kwa sasa ni kupambana kushinda kwenye mechi zetu zinazofuata.

“Kazi yangu itakuwa moja tu kufunga endapo nitashindwa kufunga basi nyingine itakuwa ni kutengeneza nafasi ya kufunga kwa wenzangu bila kujali nani atafunga kwani kwenye mpira kinachotafutwa ni pointi tatu pekee,” amesema Sheva mwenye mabao manne kwa sasa.