LAZIMA YANGA MKUBALI KUNA TATIZO, MSIACHE MZIGO WOTE UWAANGUKIE KINA BALINYA...

NA SALEH ALLY

WAKATI gumzo lilikuwa Sadney Urikhob raia wa

Namibia kuamua kuvunja mkataba, sasa

mambo yamegeuka, mshambuliaji mwingine,

Juma Balinya kutoka Uganda naye amevunja

mkataba na Yanga.

Wawili hawa wamevunja mkataba baada ya

karibu wachezaji wote wa kigeni kusema

wanataka kuvunja mikataba yao kutokana na

kutolipwa mishahara yao kwa miezi miwili.

Tayari Mwenyekiti wa Yanga, Dokta Mshindo

Msolla amejaribu kulifafanua suala hilo kwa

kueleza namna walivyokuta madeni lukuki na

tayari wameanza kupambana nayo ili kuweka

mambo sawa.

Jambo zuri kupambana nayo kwa kuwa hakuna

nafasi ya kusema wakati unaingia kwenye

uongozi hautakuta madeni. Hili ni jambo

lililotarajiwa na walipaswa kulitegemea na

kuwa na mpango mkakati wa kupambana nalo

kabla.

Unapoingia kwenye uongozi, bila shaka madeni

ni lazima kama ambavyo mtakuta kiasi cha

fedha. Mfano, fedha za wadhamini kama

SportPesa na Azam TV, uongozi umeingia na

kuzikuta. Kwani kila zitakapoingia zitakuwa

chini yao na wao hawakuhusika katika

kuzitafuta.

Mambo ya uongozi ndivyo yalivyo, utakuta kile

kinachoingia lakini utakikuta kile ambacho

unapaswa kukilipa ili kufanya mambo yaende

sawa. Hivyo ni jambo ambalo linahitaji mipango

ya muda mfupi na mrefu kila unapoingia

kwenye kuongoza jambo na hasa taasisi,

tukubali, kwa taasisi kubwa kama Yanga,

haiwezi kukosa madeni.

Sasa Yanga wanapaswa kuwekeza nguvu nyingi

katika matatizo yanayojitokeza. Sote tukubali,

hakuna mchezaji Yanga anaweza kusema leo

wamemuacha kutokana na kutoonyesha

kiwango.

Badala yake, wachezaji wanaweza kusema

wameondoka Yanga kutokana na mazingira

magumu eneo la kazi. Nasema hivi kwa kuwa

nimeona kuna baadhi ya viongozi wanataka

kutumia nguvu nyingi kuonyesha wachezaji

walikuwa na matatizo ndio maana hata wao

wamewaachia waende.

Kama itakuwa hivyo kwa asilimia 50 au zaidi ya

usajili mpya kushindwa kufanya vizuri maana

yake kuna tatizo kubwa pia katika suala la wale

waliohusika na usajili.

Usajili umeshindwa kuwa msaada, umeshindwa

kuipeleka Yanga ilipotaka. Kulalamika wachezaji

hawakuwa na kiwango kizuri ni kujitangaza

kwamba hakukuwa na umakini wakati wa

usajili. Hivyo hili nalo ukiachana na mishahara,

ni tatizo la uongozi wa Yanga pia.

Ninavyoona hakuna sababu za msingi kwa

uongozi wa Yanga sasa kuanza kulaumu kwa

kile walichokifanya wao au kilichokuwa chini

yao wakati wa utekelezaji.

Kiongozi mmoja wa Yanga ameonyesha anataka

kuuonyesha umma wachezaji hao hawakuwa

na maana wala msaada. Ndio maana nao

walijiandaa kuwaacha.

Swali vipi waliwaona wanafaa na miezi kadhaa

tu hata nusu mwaka haujafika, tayari wachezaji

watatu au wanne kati ya tisa wawe hawafai.

Vizuri sasa kuelekeza nguvu kwenye utatuzi wa

tatizo. Yanga ifanye kazi ya kuangalia wapi

ilipojikwaa badala ya kutaka kuweka nguvu

nyingi kutaka kujibu kilichotokea ambacho

hakihitaji hata majibu.

Mipango ya muda mfupi lazima itakuwa imefeli,

hivyo uongozi ujipange kuhakikisha hiki

ambacho wachezaji wake wa kimataifa

wamekivumbua, hakijirudii tena kwa kuwa

safari ya msimu wa 2019/20, bado ni pevu

kabisa.

Kingine ambacho Yanga wanapaswa kujifunza

ni hiki; si sahihi wakati mwingine kufanya usajili

kwa kuwafurahisha mashabiki na wanachama.

Badala yake kikubwa ni kuangalia usahihi wa

kile kinachofanyika kwa ajili ya sasa, baadaye

na kesho.

Kulikuwa na kila sababu wakati wa usajili, Yanga

waangalie madeni waliyonayo na kuweka

mipango ya kuyamaliza. Halafu ingewezekana

kusajili wachezaji wazuri lakini wa bei nafuu,

badala ya kuona raha kujaza wa kimataifa ili

kuuonyesha umma wa Wanayanga na wapenda

soka kuwa “tuko vizuri”, kumbe mnatengeneza

maumivu ambayo baadaye hamtaweza

kuyavumilia.