KWA KESHO PALE TAIFA KILA MMOJA ATIMIZE MAJUKUMU YAKE KWA UMAKINI, ISHU ZA KISHIRIKINA TUPA KULE

MCHEZO wa watani wa jadi, Yanga na Simba siku zote huwa na matukio mbalimbali iwe ndani au nje ya uwanja.

Kama utakuwa umesahau, kumbuka mchezo wa mzunguko wa kwanza namna ulivyokuwa. Kulikuwa na matukio mengi ya ndani na nje ya uwanja.

Ya nje ya uwanja hufanywa na mashabiki na yale ya ndani ya uwanja wahusika wakuu ni wachezaji, makocha na waamuzi.

Katika mchezo wa kwanza, lawama nyingi zilikwenda kwa waamuzi, baadhi ya wachezaji na wasimamizi wakuu wa ligi ambao ni Shirikisho la Soka Tanzania (TFF) na Bodi ya Ligi.

Mwamuzi wa kati Jonesia Rukyaa alitupiwa lawama kutokana na baadhi ya matukio yake kuonekana ya utata, lakini pia upande wa wachezaji, wale wa Simba wengi ndiyo walitupiwa lawama. Upande wa Yanga walisifiwa.

Unajua kwa nini, wale wa Yanga walisifiwa sana kutokana na kusawazisha mabao na mwisho wa siku matokeo kuwa 2-2. Awali walifungwa 2-0 na ilionekana Simba inaweza kuongeza mengine na kuibuka na ushindi, lakini ikakwama.

Simba wachezaji wao, Mzamiru Yasin na Aishi Manula waliingia kwenye lawama wakitajwa kwamba wamesababisha kupatikana kwa sare hiyo.

Kelele zilipigwa sana hasa katika lile bao la kwanza lililofungwa na Balama Mapinduzi ambaye alimpokonya mpira Mzamiru, kisha akaachia shuti la mbali sana lililomshinda Manula. Hapo ndiyo Wanasimba wengi waliona kuna makosa.

Wanasahau kwamba katika mchezo wa soka matukio ya namna hiyo yanatokea kwa bahati mbaya. Sidhani kama kuna mchezaji yeyote wa Simba au Yanga akipewa nafasi anacheza chini ya kiwango kwa makusudi ili tu kuigharimu timu yake. Wote wanacheza kwa moyo mmoja kusaka ushindi.

Sasa yale yaliyotokea tuache kama yalivyo, tuangalie mambo mengine kuelekea mchezo wa kesho Jumapili.

Yanga safari hii watakuwa wenyeji wa Simba katika mchezo huo wa kesho Jumapili utakaochezwa kwenye Uwanja wa Taifa jijini Dar es Salaam.

Niwasihi kila mmoja kwa nafasi yake kufanya kile ambacho kitakuwa bora ili kuufanya mchezo huu kuwa wa kuvutia zaidi.

Kwa wachezaji, kila atakayepata nafasi acheze kwa kujituma kwa nia ya kuitafutia timu yake matokeo mazuri.

Makocha nao wapange vikosi vizuri, waamuzi wachezeshe kwa kuzitafsiri vema sheria 17 za soka, lakini pia, watu wa usalama nao waifanye kazi yao vizuri kuwadhibiti wale mashabiki wakorofi. Pia mashabiki na nyinyi kuweni wastaarabu.

Hivi unawezaje kutoka nyumbani kwako kisha unaenda uwanjani kwa lengo la kufanya fujo tu. Huo si uungwana hata kidogo.      

Kila mmoja wetu anatarajiwa kuona soka safi na la kuvutia, sasa asitokee mmoja kati ya hao niliowabainisha akatibua mambo.

Kwa kiasi kikubwa pambano la watani wa jadi linapokaribia mambo mengi ya ajabu huzuka na kuanza kuleta presha kubwa na kuondoa ile ladha halisi ya dabi hii kubwa Afrika Mashariki na Kati.

Vitendo vya kishirikina vimekuwa vikitawala sana kuelekea pambano hili, pia kumekuwa na lawama kwa timu hizi kufanyiana hujuma. Hayo yote yasipewe nafasi.

Ni imani yetu kubwa sisi wadau wa soka tutashuhudia zaidi soka la kuvutia na siyo vimbwanga ambavyo kwa kiasi kikubwa vitaharibu ladha ya pambano hili lenye hadhi yake Afrika.

Kila la heri kwenu, aliyejiandaa vizuri naamini ndiye atakayevuna matunda mazuri.