NAMUNGO FC YATINGA FAINALI KOMBE LA SHIRIKISHO, YAMSUBIRI MSHINDI WA MCHEZO WA SIMBA NA YANGA KESHO

NAMUNGO FC ya Lindi imeibuka na ushindi wa bao 1-0 na kukata tiketi ya kushiriki hatua ya fainali ya Kombe la Shirikisho baada ya kuitungua Sahare All Stars. 

Mchezo huo uliochezwa Uwanja wa Mkwakwani,  Tanga ulikuwa na ushindani mkubwa kwa timu zote kusaka ushindi ambapo dakika 45 za kipindi cha kwanza zilikamilika bila kufungana.

Bao pekee la Namungo lilifungwa na Edward Manyama dakika ya 80 na kuwapa tiketi ya kutinga fainali ya Kombe la Shirikisho.

Namungo ilitinga hatua ya nusu fainali kwa ushindi wa mabao 2-0 mbele ya Alliance FC mchezo uliochezwa Uwanja wa Majaliwa, Lindi.

Sahare All Stars ambayo ni timu pekee inayoshiriki Ligi Daraja la Kwanza kutinga hatua ya nusu fainali ilishinda mbele ya Ndanda FC kwa penalti 4-3 baada ya dakika 90 kukamilika kwa sare ya kufungana bao 1-1, Uwanja wa Mkwakwani. 

Namungo anasubiri mshindi wa mchezo wa kesho, Julai 12 kati ya Simba na Yanga ili wakutane naye hatua ya fainali.