HIZI HAPA PIA MBALI YA DABI RATIBA ILIBADILIKA, ILA GOMA LILIPIGWA

WEKA kando hasara ya muda na nguvu ambayo ilipatikana Mei 8 baada ya mchezo wa watani wa jadi, Simba na Yanga kughairishwa kutokana na Klabu ya Yanga kugomea mabadiliko ya mchezo huo.

 

Karikaoo dabi kwa msimu wa 2020/21 mabadiliko yake yamefanywa raundi zote mbili ambapo ile ya kwanza mambo yalikwenda sawa ila hii ya pili mambo yalibuma.

 

Zipo mechi nyingine ambazo zilifanyiwa mabadiliko na mechi zilichezwa kama kawaida hizi hapa baadhi yake twende sawa:-

 

Yanga 0-1 Azam FC

 

Mchezo huu ulipangwa awali kuchezwa saa 1:00 usiku ulipelekwa mbele mpaka saa 2:15 usiku ilikuwa ni Aprili 25. Taarifa ilitolewa Aprili 21 na Bodi ya Ligi Tanzania ambapo ilieleza kuwa sababu kubwa za kubadili muda wa mchezo huo ilikuwa ni Uwanja wa Mkapa kuwa na matumizi mengine.

 Simba 5-0 Mtibwa Sugar

 Mchezo huu ulichezwa Uwanja wa Mkapa ambapo awali ulipangwa kuchezwa saa 1:00 usiku ulibadilishwa muda mpaka saa 10:00 jioni na ngoma ilichezwa Aprili 14 taarifa hiyo ilitolewa Aprili 13 na haikueleza sababu ya muda kubadilishwa.

 

Simba 2-2 Azam FC

Mchezo huo uliochezwa Uwanja wa Mkapa, Februari 7, ulipaswa kuchezwa saa 1:00 usiku na badala yake muda ukarudishwa nyuma mpaka saa 10:00 jioni.

Sababu kubwa ya kufanya mabadiliko hayo ilikuwa ni changamoto ya miundombinu iliyoathiri uwakaji wa taa. Taarifa hiyo ilitolewa Februari 6 na mechi ikachezwa Februari 7.

 Yanga 1-1 Simba

 Mchezo huu wa ligi wa mzunguko wa kwanza awali ulipangwa kuchezwa Oktoba 18,2020 Uwanja wa Mkapa.Ulipelekwa mbele mpaka Novemba 7, Uwanja wa Mkapa saa 11:00 jioni.

 Sababu ya mabadiliko hayo ilielezwa kuwa yalitokana na uwezekano mkubwa wa kuwepo kwa vikwazo katika usafiri wa kimataifa baada ya kukamilika kwa michezo ya kimataifa iliyo kwenye kalenda ya FIFA jambo ambalo linaweza kuathiri vikosi vya klabu hizo mbili.

Pia taarifa hiyo ileleza kuwa nchi mbalimbali bado ziliendelea kuweka masharti magumu katika taratibu za usafiri wa kimataifa tangu kuzuka kwa janga la virusi vya Corona vinavyosababisha ugonjwa wa COVID-19.

Taarifa ya mabadiliko ilitolewa Oktoba 7 na mechi ilichezwa  Novemba 7.

Ligi Daraja la Kwanza

Sio ndani ya Ligi Kuu Bara pekee ila mpaka Ligi Daraja la Kwanza pia mabadiliko yapo. Oktoba 25,2020 mchezo wa Ligi Daraja la Kwanza kati ya Majimaji dhidi ya Mawenzi Market uliopaswa kuchezwa Oktoba 25 ulipelekwa mbele mpaka Oktoba 26.

Sababu kubwa ya kufanya hivyo ilikuwa ni timu ya Mawenzi Market kushindwa kufika kituoni kutokana na kupata ajali maeneo ya Iringa wakati wakielekea Songea. Mchezo huu ulichezwa siku ya pili.

 Tayari Bodi ya Ligi Tanzania ametoa taarifa kuhusu mchezo wa Simba v Yanga ambapo wameeleza kuwa itapangwa tarehe na kuhusu hatma ya viingilio, vitatumika vilevile kwa wale ambao walikuwa wamelipa.