YANGA TUMEMUAGA NIYONZIMA, VIP KUHUSU YONDANI?

 KLABU ya Yanga imeonyesha heshima kwa kuamua kutoa mkono wa byebye kwa nyota wake, Haruna Hakizimana Niyonzima raia wa Rwanda.

Niyonzima ameagwa kwa heshima wakati Yanga ikiivaa Ihefu FC iliyokuwa inapambana kuhakikisha inashinda mechi yake dhidi ya Yanga ili ibaki Ligi Kuu Bara.

Yanga wameamua kumuaga Niyonzima kutokana na kazi kubwa aliyoifanya akiwa na kikosi cha Yanga ambacho kimemaliza msimu kikiwa katika nafasi ya pili lakini kimetinga fainali ya Kombe la Shirikisho la Azam Sports.

Kiungo huyo amefanya mengi makubwa akiwa na kikosi cha Yanga, pamoja na kwamba alilazimika kuondoka mara moja na kurejea tena.

Mara moja, Niyonzima aliondoka na kujiunga na watani wa Yanga, Simba ambako baada ya hapo aliondoka na kwenda zake kwao Rwanda.

Wakati Yanga wakipika kikosi upya walimfuata tena Kigali ambako walizungumza naye na kufanikiwa kumrejesha. Amekuwa na mchango wake wakimaliza nafasi ya pili na fainali ya Kombe la Shirikisho.

Pamoja na yote, Niyonzima ameacha alama wakati wa ile Yanga ya Kampakampa tena ambayo ilikuwa ikitoa mateso kwa watani wake Simba kila mara.

Yanga ambayo ilikuwa ni burudani ya aina yake na kama unakumbuka, wakati anaingia pacha kwenye kiungo alikuwa ni Athuman Iddi Chuji na wakatikisa hasa. Wakati Chuji anaondoka Yanga, Niyonzima aliendelea kutamba na kwa wakati mwingine tena akasumbua akiwa na Thabani Kamusoko, wakiifanya Yanga kuwa gumzo hadi inatinga hatua ya makundi ya Kombe la Shirikisho Afrika.

Bila shaka Yanga wanafanya jambo bora

kabisa la kumuaga raia huyo wa Rwanda

kutokana na kazi yake nzuri aliyoifanya

akiwa na Yanga kwa vipindi hivyo viwili

na anakuwa mmoja wa wachezaji wa

kigeni waliofanya vizuri zaidi katika Ligi

Kuu Bara.

Sasa anaondoka, heshima anastahili na

mimi ninauga mkono ingawa nina jambo

la kuuliza. Kwamba huu utaratibu mara

kadhaa, kuanzia kwa Yanga na baadhi ya

klabu zimekuwa zikiona sahihi kuwapa

heshima kwa kuwaaga au kuwapongeza

wachezaji wanapokuwa wanaondoka na

zaidi ni wale wa kigeni.

Kwa Yanga, inaweza kuwa imefanya kwa

wazalendo, lakini nawauliza tena,

hawaoni wachezaji kama Kelvin Yondani

pia walipaswa kuagwa kutokana na

mchango wao.

Mfano, wakati akiondoka Niyonzima,

ninaamini Yondani angekuwa tayari

ameishaagwa. Wakati fulani alikaa nje

bila ya timu na Yanga ilimaliza msimu

ambapo ingeweza kufanya jambo kwake

na kumuaga kwa kuwa alikuwa anastahili

kuagwa ili kuonyesha wanajali muda

wote wa mafanikio akiwa Yanga.

Wakati Niyonzima akitamba akiwa na

Chuji, Kamusoko na wengine. Yondani

ndiye alikuwa akishikilia jahazi la ulinzi la

kikosi cha Yanga. Tena alifanya kazi bora

akiwa na Nadir Haroub ‘Cannavaro’,

lakini hata baada ya kustaafu kwake,

Yondani aliendelea kupambana akiwa na

wachezaji kadha wa kadha mfano wa

Vicent Andrew ‘Dante’, Shaibu Ninja,

Said Makapu na wengine, akaendelea

kuwa tegemeo na mhimili wa ulinzi wa

klabu ya Yanga.

Hata wakati ule Niyonzima alipoondoka

kwenda kwao Rwanda, Yondani alikuwa

bado anaitumikia Yanga. Niyonzima

aliporejea na kujiunga na Simba, Yondani

bado alikuwa akipambana kukitumikia

kikosi cha Yanga. Leo kwenye kuagwa,

hakuwahi kupewa hiyo heshima.

Vizuri kufanya kama hicho kilichofanyika

kwa Niyonzima lakini vizuri zaidi

kuwakubuka waliofanya vizuri na kujituma kwa moyo wao wote kuhakikisha Yanga inapata inachotaka.

Tumeona hata Yanga mpya ambayo

ilibadili zaidi ya wachezaji 15, bado

haijafikia mafanikio ya waliyokuwa nayo

katika Yanga ya kina Yondani.

 Kama ambavyo nimekuwa nikisema siku zote,

timu inapaswa kuendelea kujengwa na

msimu ujao unaweza kuwa bora zaidi

kwa Yanga kama watajipanga lakini

naendelea kuwakumbusha, Yondani ni

gwiji nchini, ni mmoja wa wachezaji bora

wazalendo kuwahi kutokea nchini na

anapaswa kupewa heshima yake.

Inawezekana isiwe kwa Yondani pekee

au Yanga pekee, nizikumbushe klabu nyingine, kuwaaga wachezaji wao kwa heshima na hasa wale waliojituma hasa kutaka klabu iwe bora na kushinda, wanapaswa kupewa heshima zao na

tusiwadharau kwa uzalendo wao na mara nyingi nimeona, wako viongozi wengi katika klabu zetu wana hisia za kuwadharau wachezaji wazalendo kwa

kuwa tu, wanaona kuwafanya waonekane wakubwa ni kama wao viongozi kujishusha.

Tena wakati mwingine, unakuta kiongozi

ana miaka miwili tu ndani ya klabu lakini

mchezaji ameitumikia klabu kwa zaidi ya

miaka sita hadi nane. Huu si uungwana

na haifai kuendelea, badilikeni.