MWAMUZI AFUNGIWA MAISHA KWA KUMTANDIKA MCHEZAJI

Mwamuzi mmoja nchini Russia amefungiwa maisha baada ya kuamua kutoa kipigo kwa mchezaji wa timu aliyokuwa anaichezesha.

Adhabu hiyo imetolewa jana baada ya tukio hilo limetokea la juzi katika mji wa Grozny wakati Amkar Perm ilipokuwa inaivaa Terek.

Mwamuzi huyo msaidizi Musa Kadyrov aliyekuwa na kibendera, alikitupa ghafla na kuingia uwanjani na kuanza kumtandika mlinzi wa Amkar, Ilya Krichmar mwenye miaka 18.

Kadyrov alimvamia mchezaji huyo baada ya mwamuzi kupuliza kipenga cha kumaliza mpira.

“Alinisukuma nikiwa nimeanza kuelekea katika benchi baada ya filimbi ya mwisho, baada ya kuanguka alianza kunipiga ngumi na mateke na baadaye kuniburuza huku akiwa ameshika miguu yangu,” alisema Krichmar.

“Ajabu hata wachezaji wa timu pinzani waliungana na mwamuzi huyo na kunishambulia mfulizo.

“Waliniumiza na damu zikaanza kutoka, lakini wachezaji wenzangu walikuja na kunisaidia. Lakini ninamshukuru mmoja wa wachezaji wa timu pinzani alinisaidia kutoka pale kwa kuwa tuliwahi kucheza pamoja,” alisema beki huyo.