MAKALA..... SCUD: ACHANA NA MABAO YA SIMBA, BAO BORA NILIFUNGA ZANZIBAR

Na Saleh Ally

KUNA mambo mengi yamepita katika historia ya soka ya Tanzania, lakini kuna baadhi ambayo kamwe ni vigumu kuyasahau na huenda yakabaki kuwa gumzo kwa kipindi kirefu sana.

Mabao mawili, moja kila mechi aliyoyafunga mshambuliaji wa zamani wa Yanga, Said Sued ‘Scud’ mwaka 1991 wakati timu yake ikiibuna na ushindi wa mabao 1-0 kila mechi, gumzo lake halitaisha.

Scud alikuwa gumzo wakati huo kutokana na uwezo wake wa kupachika mabao, uwanjani hakuwa mchezaji mwenye mambo mengi lakini alichojua ni ‘kucheka’ na nyavu.

Said Sued 'Scud' wa tano kulia kiwa na Yanga mwaka 1991

Mshambuliaji huyo wa zamani wa Yanga ameamua kurejea kwao Kigoma, anaishi akiendelea na maisha ya kawaida, pamoja na kufaya biashara zake amekuwa ni mfugaji.

Katika mahojiano maalum na Championi Jumatatu, Sued anaelezea mambo yakiwamo wakati wanacheza, lakini mpira wa sasa pamoja na wachezaji.

“Soka la enzi zetu lilikuwa na changamoto na ushindani mkubwa, mfano wakati nikiwa Yanga nilikuwa nagombea namba na watu kama wanne au zaidi, kulikuwa na Sanifu Lazaro ‘Tingisha’, Ramadhani Kilambo, Joseph Machela na John Mngazija.

“Makocha wetu (Syllersaid) Mziray na (Boniface) Mkwasa walikuwa katika wakati mgumu, hivyo muda wote tulikuwa katika kuwania namba. Hauwezi kuacha kijituma hata kidogo,” anasema Scud.

Simba v Yanga:

Mechi hii huwa ya kawaida kabisa unapokuwa uwanjani, lakini mashabiki wanaifanya inakuwa kubwa na hofu sana. Mimi sikuwa na uoga hata kidogo, hata zile mechi nilizowafunga Simba nilijua nitafunga kwa kuwa nilipania kufanya hivyo na nilikuwa fiti sana.

Beki anayemvutia:

Sikuwa na uoga kwa mabeki hata kidogo, wakati huo kulikuwa na mabeki wengi sana wazuri na wenye uwezo mkubwa ukilinganisha na sasa.

Ila nilivutiwa sana na beki wa Reli Morogoro, Fikiri Magoso ambaye baadaye alikwenda Simba. Alikuwa anaijua kazi yake, ni kati ya mabeki wenye kiwango cha juu sana. Nakumbuka pia Simba walikuwa na watu kama Mavumbi Omari, Iddi Selemani, Twaha Hamidu ‘Noriega’, pia kiungo walikuwa na mtu kama Hamis Gaga, haikuwa kazi lahisi.

Jina Scud:

Hakika sijui nani hasa alinitunga, sikuwahi kumuona mtu mmoja akisema yeye alianzisha jina hili ingawa lilianza katika kipindi ambacho kulikuwa na vita ya Ghuba ya Uajemi kati ya Iraq iliyokuwa inaongozwa na Saddam Hussein dhidi ya Marekani na washirika wake.

Sasa nilikuwa napiga mashuti makali sana, hivyo wakawa wanayafananisha na mabomu ya Scud. Kuna wakati Simba walisema watanitafutia Patriot (mabomu yaliyokuwa yanaangusha Scud), lakini hadi nastaafu sikuiona.

Bao kutorudi:

Kweli nilikuwa nikifunga mabao mengi sana hayarudi, naona kama ilikuwa inatokea lakini mara nyingi nilikuwa nikisali na kumuomba Mwenyezi Mungu kwanza anisaidie nifunge na iwapo nitafanikiwe kufanya hivyo basi bao lisirudi.

Lakini pia nilikuwa nikifanya juhudi za mazoezi na maandalizi ya kutosha kila mechi, nilikuwa sitaki kucheza bila ya kufunga. Ndiyo maana nashangazwa siku hizi kumuona fowadi anaingia katika eneo la hatari la kwa zaidi ya mara tatu hajapiga golini, au mshambuliaji eti anacheza dakika 45 bila ya kupiga shuti golini.

Bao bora:

Wengi wamekuwa wanayazungumzia mabao niliyofunga dhidi ya Simba, lakini bao bora ninalolikumbuka sana nakumbuka nilifunga Zanzibar. Tuliweka kambi kujiandaa na mechi dhidi ya Simba.

Tukawa tunacheza mechi za kirafiki, nakumbuka ilikuwa mechi dhidi Mlandege, Yanga tulishinda mabao 2-0, moja lilifungwa na John Alex ‘Rwena’ na mimi nikafunga moja ambalo nilipiga shuti kutoka katikati ya uwanja.

Kipa alipiga goal kick, ule mpira wakati unaanguka katikati ya uwanja wakadhani nitautuliza. Lakini sikufanye hivyo, kabla haujagusa chini, nilipiga shuti la moja kwa moja, alichofanya kipa ni kugeuka na kuukota nyavuni. 

Mechi ngumu:

Sijawahi kucheza na Simba mechi ikawa ngumu sana hadi nikachanganyikiwa, ila tulikuwa tukikutana na Pamba ya Mwanza, hata sisi tulikuwa tunaambiana kwamba kuna kazi kubwa mbele yetu.

Nakumbuka mwaka 1991 tulipokwenda Kanda ya Ziwa, nilianza nikafunga Shinyanga, tulipokuwa Kagera nikatoa pasi kwa Abubakari Salum ‘Sure Boy’ akafunga bao la ushindi.

Tukarudi Mwanza, mechi dhidi ya Pamba haikuwa mchezo kama kawaida. Nilianza kufunga bao safi sana, lakini wakati tunaona tumeshinda Pamba walipata bao la kusawazisha nakumbuka mfungaji alikuwa ni Hamza Mponda. Mechi ilimalizika kwa sare ya 1-1.

Kwenda Yanga:

Nilitua Yanga nikitokea Kurugenzi Kigoma, nilisajili hapa Kigoma. Kawaida Yanga ilikuwa ina wawakilishi wake ambao wanaangalia wachezaji mikoani. 

Wa hapa Kigoma walikuwepo akina Mzee Kayombo, Kingalu na Arif Sharif ambaye nilipelekwa kwake Ujiji ambako nikasaini fomu za kuichezea Yanga.

Waliniona katika michuano ya vijana ya taifa iliyofanyika Tabora, nilifunga bao kila mechi. Nikaibuka mfungaji bora. Nakumbuka fainali tulicheza na Tabora.

Washambuliaji:

Kila timu ya Ligi Kuu Bara wakati huo ilikuwa na mshambuliaji hatari sana, hata ukienda Zanzibar ungekuta hivyo. Kabla hamjakutana na timu kuna wachezaji mnakuwa mnawazungumzia kutokana na umahiri wao. 

Lakini leo hakuna, hili pia ni tatizo la wachezaji wengi kutokuwa na vipaji na wanaojituma. Wengi wanaingia katika soka kutokana na kujuana au nafasi za ndugu au wazazi wao katika soka lakini si uwezo wao hasa.

Hivi karibuni nilikuwa Dar es Salaam, nikaiona Taifa Stars ikicheza na kuifunga Cameroon bao 1-0, kweli bado sijaridhishwa na viwango.

Siasa na soka:

Soka inayumba kwa kuwa watu wengi wanaongoza kutokana na kuwa na fedha, au wana malengo ya kufanikiwa katika siasa au biashara zao na si kuundeleza mpira.

Hao wakiona unataka kuongoza basi wanafanya kila linalowezekana kuhakikisha wanakutoa, wanajua hawakucheza, hivyo hawataki uwe karibu. Mimi sipendi kuiudhi nafsi yangu, ndiyo maana najiweka kando lakini naumia sana kuona mchezo huu unapokwenda.

Scud ni kati ya washambuliaji waliovuma kwa kipindi kifupi, lakini uwezo wao wa kufunga tokea akiichezea Coop ya Mwanza ulikuwa ni mkubwa sana.

Anasema huenda akaamua kufanya kazi ya ukocha kwa kuwa tayari amesoma kozi ya awali na anategemea kujiendeleza zaidi kimasomo na ikiwezekana afundishe.