PROFESA CHUO KIKUU, KAMATI WAIFUMUA NA KUIJENGA SIMBA

Na Mwandishi Wetu

WAJUMBE wa kamati ya Marejeo ya klabu ya Simba, juzi walikutana na Profesa Tolly Mbwete wa Chuo Kikuu Huria (Out) kujadiliana kuhusiana na mpango wa uendeshaji wa klabu hiyo kisasa ‘strategy planning’.

Katika kikao hicho kilichofanyika Kunduchi jijini Dar es Salaam, Simba walijadili masuala kadhaa ikiwa ni pamoja kufumua mfumo wa sasa, kuangalia faida ambazo Simba zinaweza kutumika, mapungufu na nini cha kufanya ili mambo yaende kitaalamu katika uendeshaji wa klabu hiyo.

Wajumbe wa kamati hiyo waliohudhuria ni pamoja na Crescentius Magori, Omari Gumbo, Francis Waya, Honest Njau, Mulamu Ng’ambi, Michael Wambura, Evans Aveva na wengine ambao walijadili masuala hayo.

Katibu Mkuu wa Simba, Evodius Mtawala alisema kikao hicho kilikuwa na mafanikio makubwa na walipiga hatua katika mjadala huo.

“Profesa Mbwete ndiye aliongoza majadiliano hao na timu yake kwa kuwa wao ndiyo wana utaalamu na uzoefu mkubwa kuhusiana na masuala hayo. Lengo ni kuibadilisha Simba ili iendeshwa kitaalamu zaidi.

“Tuliangalia mambo kadhaa, hapa Simba ilipo, tunakwenda wapi. Kuna kitu kinaitwa Swot analysis. Yaani Simba ikiamua kwenye kibishara, ina nini kinachoiwezesha kupata fedha, mazingira, nini matatizo au udhaifu na mengine mengi.

“Kwa kifupi ni mchakato wa kuweka mambo kitaalamu zaidi tena kwa programu ya miaka mingi baadaye. Simba itakuwa inajua nini kinatakiwa badala ya kukurupuka kila mwezi kupanga cha kufanya.

“Bado mchakato unaendelea na tutawataarifu nini kinaendelea,” alisema Mtawala ambaye ni katibu mkuu kijana zaidi kuongoza katika klabu kubwa kama Simba.

Iwapo Simba itakamilisha mpango huo chini ya Profesa Mbwete, itakuwa klabu ya kwanza nchini kutumia mfumo huo ambao hutumiwa na klabu kubwa za Ulaya, Marekani na Asia, pia makampuni makubwa dunia.