MAKALA: NISHAWISHI ILI NIAMINI SIMBA IMEFANYA BIASHARA KWA OKWI…

OKWI AKITUMIKIA ESS...

Na Saleh Ally

Taarifa zinaeleza kuwa klabu ya Simba imemuuza kiungo wake nyota Emmanuel Okwi kwa klabu ya Etoile Du Sahel kwa dau la dola 300,000 (zaidi ya Sh milioni 486).

Sh milioni 486 si fedha kidogo kwa Simba, hakika unaweza kusema ni mpango mzuri kwa kuwa unaisaidia Simba kuingiza fedha nyingi ambazo zitakuwa ni sehemu ya kusaidia maendeleo.

 

MOJA YA MADUKA YA ESS, HAWA JAMAA WANAIJUA BIASHARA, SI KWELI KWAMBA HAWANA FEDHA...

Kawaida moja ya biashara ambayo inaziingizia klabu nyingi fedha barani Ulaya na kwingineko ambako mchezo wa soka umeendelea ni kununua wachezaji kwa bei ya chini au kawaida, inawakuza na kuwaendeleza halafu inawauza kwa bei juu.

 

MOJA YA MADUKA YAO KWA NJE..

Mfano mzuri ni Manchester United ambayo ilimnunua Cristiano Ronaldo kutoka Sporting Lisbon ya Ureno akiwa kinda kwa kiasi cha pauni milioni 12 na kumuuza kwa pauni milioni 80 kwa Real Madrid. 

Utaona namna Manchester United ilivyofaidika kutokana na uuzwaji wa mchezaji huyo, lakini hiyo ni sehemu tu ya mfano kwa kuwa klabu nyingi zinafanya kwa kufaidika na mauzo ya wachezaji kwenda klabu nyingine.

Katika biashara ya Simba na Etoile Du Sahel kuna walakini mkubwa ambao hakika umekuwa ukiendelezwa bila ya mwanachama hata mmoja kupata nafasi ya kuhoji udhaifu mkubwa kupindukia katika soka la wakati huu.

Ilichofanya Simba ni biashara katika mchezo wa soka ambayo ilikuwa ikifanyika miaka 20 au 30 iliyopita, si sasa. Kufanya biashara kwa kusema imemuuza mchezaji, halafu isipate hata senti na baada ya hapo ndiyo inasumbuka kumpata mnunuzi alipe deni ni kitu cha ajabu.

Simba wamemuuza Okwi kwa fedha nyingi, halafu hadi leo haijapata hata senti moja. Vibaya zaidi imekuwa ikitumia fedha kwenda Souness, kwa ajili ya kudai fedha zake.

‘Akili’ ya biashara lazima iwe muongozo katika suala la uuzwaji wa wachezaji, Simba haijaenda na mfumo huo na hata kama ikitokea ikalipwa fedha hizo, basi kuna mambo mengi na hasara itakuwa imepata.

Mfano, fedha hazijapatikana katika wakati mwafaka, najiuliza vipi Mwenyekiti wa Simba, Ismail Aden Rage alikubali kufanya biashara hiyo hata bila ya ‘advance’. Na hasara zinazofuata kwa Simba ni kama hivi.

Kwanza, tayari Simba imekosa mambo lukuki na huenda ikaendelea kukosa katika kipindi hiki cha usajili kutokana na kukosa fedha. Kama wangekuwa wamelipwa katika kipindi mwafaka, basi klabu hiyo ingekuwa na nafasi nzuri ya kufanya usajili bora kwa ajili ya timu yake.

Lakini sasa Simba inahaha kutafuta fedha kila sehemu, wakati mwingine imekuwa ikilazimika kutaka kutanguliza ‘mali kauli’ kwa kuwa haina fedha, lakini Waarabu wa Tunisia wameendelea kuzikalia fedha hizo kwa visingizio lukuki.

Inawezekana kama wanazo basi wanazifanyia biashara, lakini kama hawana wanasubiri hadi hapo watakapomuuza Okwi, ndiyo wakate kiasi kidogo na kuilipa Simba. Wao watakuwa wamefaidika na klabu hiyo ya Msimbazi itakuwa imetumika kufanya biashara kubwa ya kuwafaidisha Etoile Du Sahel.

Kingine ambacho Simba watakuwa wameingia hasara, ni fedha za kwenda kufuatilia malipo yao Tunisia. Sijui kama itakuwa imetoa klabu au mdau tu kajitolea lakini mwisho Katibu Mkuu, Evodius Mtawala na Mwenyekiti wa Kamati ya Usajili, Zacharia Hans Pope walilazimika kusafiri kwenda nchini humo.

Wazo la Mtawala na Hans Pope kusafiri kwenda Tunisia ni zuri kwa vile wanalazimika kufanya hivyo ili kupata uhakika wa mambo na huenda kulikuwa na mazungumzo yaliyopinda. Kwa kuwa Waarabu wanajiweza kwa maneno mengi, basi ahadi imetolewa hadi Septemba.

Lakini bado Simba imekula hasara kwa fedha za usafiri na malazi nchini Tunisia. Kitu ambacho kama biashara mwanzo ingefanyika katika utaratibu unaotakiwa, basi Simba isingeingia katika hasara na upotezaji wa muda kama unaoendelea sasa.

Papara katika biashara ni hasara, lakini viongozi wa klabu wanapaswa kujifunza na ikiwezekana waache mambo yaende kitaalamu kwa kuwa wanaruhusu vijana wasomi kufanya kazi kwenye klabu zao.

Basi vizuri wakapewa nafasi ya kutoa maoni au kuendesha mambo kama hayo ambayo yatasaidia klabu kufanya biashara zake kitaalamu zaidi na si kama hii ya Okwi ambayo inaonyesha huenda kukawa na harufu ya Simba kutopata lolote kama Waarabu hao hawatalipwa.

Waarabu wanaweza wasilipe wasipomuuza Okwi, wao hawatapata hasara yoyote, Simba itakuwa imepoteza fedha na muda, ambayo ni hasara kubwa sana kwa mtu yeyote mwenye hesabu za kibiashara kwenda kwenye mafanikio.

Inawezekana kabisa bado viongozi wa Simba wanaona suala hilo kama kitu cha kawaida tu, hakiwaumizi sana lakini hakuna ubishi lazima wajifunze kutokana na walichokifanya sasa kwani kimechelesha mambo mengi na si vibaya kusema wameutumia muda vibaya.

FIN.