MAKALA: ACHANA NA KUIPIGA MAN CITY, CARDIFF NI ROHO YA PAKA

Na Saleh Ally

Baada ya Cardiff kupanda Ligi Kuu England, hakuna hata mmoja aliyewahi kutaka kujua kuhusiana nayo, mchezaji mmoja tu, Craig Bellamy, ndiye angeweza kuzungumziwa.

Bellamy amekipiga Liverpool na Man City, kazi yake inajulikana, lakini wengine hawakuwa na umaarufu kiasi hicho katika uso wa dunia ya soka.

Lakini kwa eneo inapotokea timu hiyo, usithubutu, hawajali wala kufuatilia sana kuhusiana na timu nyingine kama Man United , Arsenal au Real Madrid. Namba moja ni timu yao.

Mashabiki wasiokata tamaa wa timu hiyo, wanaamini timu yao ndiyo bora zaidi ya nyingine, sema haijapata nafasi ya kucheza madaraja ya juu, hivyo kwao wanajitosheleza.

Inawezekana ushindi wao wa mabao 3-2 utawaongezea mashabiki zaidi na kuwafumbua macho wengi kutaka kujua. Ni timu yenye mambo mengi ambayo shabiki Mtanzania wa soka aliyeshangazwa na ushindi wao huo dhidi ya City angependa kujua.

Wanaitwa ‘Roho ya paka’, katika maisha yao, suala la kukata tamaa halipo hata kidogo na wanataka kutimiza ndoto bila ya kujali wapi walikosea. Wana mengi ambayo unaweza kuyajua.

MMILIKI MATATIZONI:

Mmiliki mpya wa Cardiff, raia wa Malaysia, Vincent Tan, aliingia katika mgogoro mkubwa na mashabiki wa klabu hiyo mara baada ya kuamua kubadili rangi ya jezi kutoka bluu hadi nyekundu.

Lakini pia katika nembo alimuondoa ndege wa blue na kumweka dragon, lakini mmiliki huyo alishikilia msimamo wake na sasa wako mashabiki wanaamini ndege na rangi ya blue ilikuwa mkosi au kutokuwa na bahati kwao maana siku chache baada ya kuibadili wamepanda hadi Ligi Kuu England.

KIM BO:

Mkorea Kim Bo-Kyung aliweka rekodi ya aina yake na kuonyesha mapenzi yasiyokuwa na mfano kwa timu hiyo. Pamoja na kwamba iko daraja la kwanza lakini aliamua kukataa kujiunga na timu kubwa kama Celtic na Borussia Dortmund.

Alitokea Cerezo Osaka ya Japan, akatua Cardiff na kuonyesha uwezo mkubwa hadi alipoisaidia kupanda hadi Ligi Kuu England.

Sasa ni kati ya wachezaji wenye furaha na ameonyesha kwamba katika maisha si lazima kukimbilia vinavyong’ara tu, badala yake unaweza kutengeneza chako kikawa bora.

NAHODHA HASA:

Nahodha wa timu hiyo kwa sasa ni Bellamy, lakini nahodha mwenyewe hasa ni Mark Hudson ambaye amelazimika kustaafu soka katika hatua za mwisho kabisa.

Hudson aliyeichezea mechi 31 za Ligi Daraja la Kwanza kabla ya kuumia na kulazimika kuachana na soka, bado amekuwa akishirikiana kwa karibu kabisa na kikosi hicho.

 Ingawa majukumu ya unahodha amekabidhiwa Bellamy,  beki huyo wa zamani wa Crystal Palace na Charlton, kila mechi ya timu hiyo amekuwa akiingia katika vyumba vya kubadilishia nguo kutoa maoni yake alivyouona mchezo, kama alivyofanya dhidi ya Man City na kikosi chake kuibuka na ushindi wa mabao 3-2.

AYATOLLAH KHOMEINI:

Inaweza ikawashangaza wengi hasa kwa timu kutokea Ulaya, kwani mashabiki wa Cardiff wanavutiwa zaidi na uimara na historia ya maisha ya kiongozi wa Kiislam wa zamani wa Iran, Ayatollah Khomeini.

Walianza kuonyesha hisia zao kwake wakati wa mazishi yake mwaka 1989, na tokea hapo wamekuwa wakishangilia katika mfumo wa kuonyesha kumuunga mkono au kuunga mkono utamaduni wa Iran.

Mashabiki wa timu hiyo wameonyesha kiasi gani hawajali kuonekana ni watu tofauti na mara nyingi wamekuwa wakisisitiza kwamba timu nyingi zimechagua mashujaa wao, nao pia wana haki. Mfano Wes Brom ‘wanamzimikia’ Lincoln, Man City kipenzi chao ni Dam Buster, nao wamemchagua Khomeini.

CAMPBELL:

Mshambuliaji wao nyota, Frazier Campbell, anaaminika ndiye atakuwa hatari zaidi kwa msimu huu katika Ligi Kuu England kwa kuwa si mgeni tena katika ligi hiyo ngumu.

Campbell aliwahi kuzichezea timu kubwa za Ligi Kuu England kama Manchester United, Hull City, Spurs na Sunderland. Ingawa mshambuliaji huyo mwenye miaka 25 hakupata nafasi ya kutosha sasa ni moto wa kuotea mbali, kwani ameuonyesha pia katika mechi dhidi ya Man City kwa kufunga mabao mawili.

Alionyesha ni hatari zaidi akiwa na Cardiff baada ya kufunga mabao sita katika mechi 11 za Ligi Daraja la Kwanza, lakini akasababisha faulo nyingi zaidi kuliko mchezaji mwingine katika ligi hiyo.

ROHO YA PAKA:

Kikosi cha timu hiyo kinaaminika kwa kuwa na roho ya paka, kwani mara ya mwisho kucheza Ligi Kuu England ilikuwa ni mwaka 1957, lakini miaka yote wamekuwa wakielezea nia ya kupanda na waliposhindwa, msimu uliofuata walianza upya.

Kama hiyo haitoshi kwa miaka kumi mfululizo wamekuwa kati ya timu zinazokosa kidogo tu kupanda daraja na bado wakapambana kushinda kila mechi.

Bado walionyesha wao ni roho ya paka kweli baada ya kupoteza zaidi ya fainali mbili za Kombe la FA, lakini wameendelea kuahidi siku moja watakuwa mabingwa.

Wachezaji, viongozi na hata mashabiki wa timu hiyo wanaamini ndiyo watu wasiokata tamaa hata kidogo katika mchezo wa soka kwa nchi za Uingereza.

WAO, SWANSEA:

Wapinzani wao namba moja ni Swansea, wakikutana basi Wales inasubiri kila kitu hadi watakapocheza kwa kuwa hata vile vikundi vya watukutu navyo hufanya mazoezi kujiandaa na mechi hiyo.

Jeshi la polisi huandaa vikosi maalum na wakati mwingine hulazimika kuomba msaada kutoka England ili kuhakikisha kila kitu kinakwenda vizuri.

Mwaka 1988 ilielezwa mashabiki 30 wa Cardiff walizamishwa mtoni na wengine kuuwawa wakati wanakimbizwa na watukutu wa Swansea. Wakati huo walikuwa wanatumia Uwanja wa Vetch Field ambao uko jirani na mto.

FIN.