NDUMBARO AENDELEA KUFICHA KILICHOMPELEKA FIFA

NDUMBARO AKIKABIDHIWA MIKOBA NA OFISA WA FIFA, HII ILIKUWA NI BAADA YA KIKAO HICHO

Mwanasheria maarufu nchini Dk Damas Ndumbaro ameendelea kuficha kilichompeleka katika ofisi za makao makuu ya Shirikisho la Soka la Kimataifa (Fifa) ambako alifanya mkutano.

Salehjembe ilimnasa Dk Ndumbaro akiwa katika ofisi za Fifa jijini Zurich ambako alifanya mkutano na baadhi ya maofisa wa Fifa kwa kipindi kadhaa.

Hata hivyo Dk Ndumbaro amekuwa mgumu kueleza kilichompeleka ingawa kumekuwa na tetesi kwamba huenda akagombea Urais wa Shirikisho la Soka Tanzania (TFF) na huenda Fifa walitaka kuzungumza naye kuhusiana na hilo baada ya kuchoshwa na migogoro.

“Nafikiri tulizungumza mara ya kwanza kuhusiana na suala hilo, kweli kwamba nilikuwa kule lakini ningependa mazungumzo haya yabaki kuwa kimya kwanza,” alisema.

Dk Ndumbaro ambaye ni wakala wa kuuza wachezaji anayetambuliwa na Fifa pia amekuwa mmoja wa wanasheria wanashughulika na masuala ya michezo.

Hivi karibuni, Fifa ilituma wajumbe wake baada ya kuzuka kwa tafrani kabla ya uchaguzi mkuu wa TFF ambao sasa umetangazwa kufanyika Oktoba 20, mwaka huu.