MBUYU TWITE ATANGAZA KUSTAAFU TIMU YA TAIFA

 

TWITE (KULIA) AKIWANIA MPIRA NA NIYONZIMA AMBAYE ALIKUWA PAMOJA TIMU YA TAIFA YA RWANDA

Beki wa kimataifa wa Yanga raia wa Rwanda, Mbuyu Twite, amestaafu rasmi kuichezea timu ya taifa ya nchi hiyo akieleza kuwa ni kutokana na kuzidiwa na kazi za Yanga huku taarifa nyingine zikisema ni kutokana na kufanyiwa vitendo vya kibaguzi.

Kikizungumza na Championi Ijumaa, chanzo kutoka ndani ya klabu hiyo ambacho hakikutaka kuandikwa jina lake, kilisema Twite aliamua kujitoa kutokana na kufanyiwa vitendo vya kibaguzi kufuatia kuwa na uraia wa nchi mbili za Rwanda na DR Congo.

Kilisema hivi karibuni beki huyo aliitwa timu ya taifa kwa ajili ya kucheza mchezo wa kirafiki lakini alikataa na sasa hivi ameitwa tena kwenye mchezo wa kuwania kufuzu Kombe la Dunia pia amegoma.

“Twite amejitoa kwa sababu anahisi anafanyiwa ubaguzi kwa kuwa yeye ana uraia wa nchi mbili, ndiyo maana hata alipoitwa kwenye mechi ya kirafiki alikataa.

“Pia juzikati ameitwa kwenye mchezo wa kuwania kufuzu Kombe la Dunia, pia amegomea na kumuacha mwenzake Niyonzima (Haruna) akiondoka peke yake,” kilisema chanzo hicho.

Championi lilimtafuta beki huyo ambapo alikiri kutojiunga na kikosi hicho cha Rwanda na kudai kuwa ameamua kustaafu kuichezea timu hiyo kutokana na kuwa na kazi nyingi katika klabu yake.

Alisema anatarajia kuiandaa barua na kuipeleka katika Shirikisho la Soka la Rwanda (Ferwafa) kuwaeleza kuhusiana na sakata hilo.

“Mimi nimeamua kustaafu kuichezea Rwanda kwa kuwa nina kazi nyingi sana hapa Yanga, hakuna shinikizo lolote katika hili na nitaandaa barua ili niwapelekee taarifa juu ya suala hili,” alisema Twite aliyejiunga Yanga akitokea APR ya Rwanda, msimu uliopita.