KABANGE AMFUATA MWINYI KAZIMOTO QATAR

Mchezaji kiraka, Kabange Twite amefunguka wazi kuwa hataki kuichezea Yanga, badala yake anajipanga kuelekea Qatar kucheza soka la kulipwa kama ilivyo kwa Mwinyi Kazimoyo ambaye yupo huko akiichezea Klabu ya Al Markhiya.

Kabange ambaye yupo jijini Dar es Salaam kwa muda wa wiki kadhaa sasa, alikuwa aichezee Yanga lakini ikashindikana kutokana na kutokamilika kwa baadhi ya mipango ya usajili. Ameliambia gazeti hili kuwa hana mpango huo wa kuichezea Yanga lakini akashindwa kutaja sababu za kuchukua uamuzi huo.

KABANGE

“Mimi ninapita tu hapa Tanzania naelekea Qatar kufanya majaribio ya kucheza soka, sasa hivi namngoja meneja wangu, amerudi Congo kuchukua fedha ndiyo tuendelee na safari yetu.

“Yanga naipenda sana kwani ni timu nzuri, watu wanapendana na wanaonyeshana ushirikiano wa hali ya juu, hivyo watapata mafanikio makubwa hata bila mimi kuwepo,” alisema Kabange.

Akizungumzia juu ya uamuzi wa ndugu yake, Mbuyu alisema hatapenda Kabange arejee kwa sasa Yanga bila kufafanua kwa undani.