UCHAGUZI TFF, CAMERA ZA SIMU KUTUMIKA KAMA NYENZO MUHIMU

Kumekuwa na taarifa kwamba huenda uchaguzi mkuu wa Shirikisho la Soka Tanzania (TFF) ukatawaliwa na rushwa.

Uchaguzi huo umepangwa kufanyika keshokutwa Jumapili kwenye Ukumbi wa Water Front jijini Dar es Salaam.

Baadhi ya wajumbe wameeleza kwamba kuna wagombea wametoa ahadi ya fedha kwa kila atakayewachagua.

Taarifa zinaeleza asilimia kubwa ya wagombea wamekuwa wakipiga kampeni huku wakitanguliza fedha.

“Kila mgombea anaonyesha yuko tayari kutoa fedha kwa wapiga kura, hii ni kuanzia ngazi za juu hadi chini.

“Tatizo ni moja tu, kuwa kila upande wa mgombea unahofia uaminifu wa wapiga kura, kwamba wanaweza wakapokea fedha halafu wasitimize ahadi wanapoingia kwenye kupiga kura,” alisema mmoja wa wajumbe ambaye atapiga kura.

Kutokana na hali hiyo, simu ndiyo zinaonekana kuwa nyenzo muhimu katika suala hilo.

“Kweli, kila mgombea anasema hivi, atatoa fedha baada ya uchaguzi, na kitakachotumika kuhakikisha kama umempigia kura au la ni simu.

“Yaani baada ya kupiga kura, unatakiwa kuipiga picha ile karatasi yako ya kura kwa kutumia simu halafu ukitoka unamuonyesha ili akupe fedha yako.

“Lakini wajumbe wengine wengi nao hawataki hilo, wanataka kupewa kabla, sasa hapo kidogo kumekuwa na kutoelewana.”

Uchunguzi wa Salehjembe, unaonyesha kumekuwa na harufu ya rushwa katika uchaguzi huo na kuna baadhi ya wagombea wamekuwa wakiahidi kipoza jasho kwa wapiga kura.

Mara kadhaa, uchaguzi maarufu kama huo wa TFF umekuwa ukielezwa kutawaliwa na harufu ya rushwa, ingawa haijahi kutokea mhusika kukamatwa.