VIPIGO INAVYOTOA ASHANTI VYAMPA HOFU MKWASA

Kocha Mkuu wa Ruvu Shooting, Charles Mkwasa amesema kuwa mechi dhidi ya Ashanti United inatarajiwa kuwa ngumu kutokana na kiwango kizuri cha wapinzani wao katika mechi mbili zilizopita.

Mkwasa amesema kuwa, Ashanti imekuwa ikionyesha kiwango kizuri tofauti na mwanzo ilivyoanza katika Ligi Kuu Bara, ndiyo maana ana hofu juu ya mechi dhidi ya timu hiyo, kesho Jumamosi kwenye Uwanja wa Chamazi.

“Ashanti kwa sasa ni timu nzuri sana yenye uwezo na inaonyesha soka la ushindani, lazima tujipange ili kuhakikisha tunapata matokeo mazuri. Maandalizi yetu yanaendelea vizuri na tupo tayari kwa ajili ya mechi hiyo,” alisema Mkwasa.

Licha ya kuanza ligi kwa kuyumba, Ashanti imefanikiwa kuibuka na ushindi katika mechi mbili za hivi karibuni, ambapo inashika nafasi ya 10 baada ya kujikusanyia pointi nane katika mechi tisa.

Wakati huohuo, Kocha Mkuu wa Ashanti, Nicholaus Kiondo, amesema  wamelenga kubeba pointi zote 12 za michezo minne iliyobaki ya mzunguko wa kwanza na wataanza kampeni hiyo watakapoivaa Ruvu Shooting.