HOJA YANGU: KAMA YANGA INAJIENDESHA KWA HASARA, NANI ATASALIMIKA?

Yanga ndiyo mabingwa Tanzania Bara, Yanga ndiyo klabu na timu maarufu kwa maana ya kuungwa mkono na mashabiki wengi zaidi.

Kumekuwa na ubishi kuhusiana na hilo, kwamba timu ipi kati ya Yanga na Simba ina mashabiki wengi kuliko nyingine lakini inaonekana hakuna uchunguzi wa kutosha kuthibitisha hilo.

Lakini kwa mechi za Ligi Kuu Bara kwa maana ya mashabiki walioingia kwa wingi uwanjani kwa upande wa Simba na Yanga, utagundua wengi zaidi walikuwa wa Jangwani na hata kwa mapato kwa mzunguko wa kwanza, Yanga imeshika nafasi ya kwanza na kufuatiwa na watani wake ingawa si kwa tofauti kubwa sana.

Nani ana mashabiki wengi zaidi si hoja ya msingi leo, lakini taarifa ya mapato na matumizi ya Yanga iliyotolewa siku chache zilizopita kiasi fulani inatia hofu mwenendo wa soka nchini.

Katika taarifa hiyo ya mapato iliyoanzia Januari 15 hadi Aprili 14, mwaka huu na Aprili 15 hadi Julai 14, 2013, Yanga imekuwa ikijiendesha kwa hasara.

Katika kipindi cha kwanza, Yanga ilipata hasara ya Sh milioni 99.5 na kipindi cha pili kilichoanzia Aprili 15, Yanga ikaingia hasara tena ya Sh milioni 55.4.

Kwa kuangalia kawaida, inaonekana ni kitu cha kawaida kabisa na inajulikana katika biashara kuna faida na hasara, kikubwa ni kujipanga na kufanya mambo yaende vizuri.

Lakini kama utajiuliza, inafikia Yanga, klabu kubwa, yenye mashabiki wengi vipi inajiendesha kwa hasara? Kama kweli vigezo vya kuiendesha klabu ikiwa haina shida kifedha ni mashabiki, wadhamini na haki za runinga, vipi Yanga inapata hasara?

Ukiangalia vitu viwili vya mwanzo yaani mashabiki na wadhamini, tayari Yanga inao na kinachotakiwa ni kuongeza ubunifu zaidi ili kuwapata wengi zaidi. Lile la tatu, bado limekuwa na mvutano kati ya Yanga na Azam TV, huenda likapata jibu hapo baadaye.

Lakini wakati Yanga inaendelea kusubiri kuhusiana na suala la Azam TV, bado ina nafasi ya kujiendesha kwa faida kwa kuwa ina kila sababu ya kufanya hivyo.

Jiulize kama Yanga itakuwa inajiendesha kwa hasara, vipi kwa timu nyingine ambazo haziwezi kufikia hata robo ya mashabiki wa klabu hiyo?

Uongozi wa Yanga unaweza kulalamika, mfano una sababu kadhaa ambazo ni za msingi kweli hasa kuhusiana na kupungua kwa mashabiki uwanjani. Lakini bado kuna mambo mengi ya kufanya na kuendesha klabu hiyo kwa mwendo wa biashara zaidi.

Mfano, ni kuzitangaza mechi ikiwa ni pamoja na kuweka vivutio fulani ili kuvutia watu wengi zaidi kwenda uwanjani. Kushauriana na TFF katika suala la kupanga ratiba na kuwaeleza kuangalia suala la mapato badala ya kupanga ratiba inayolenga kumaliza ligi tu.

Lakini wanaweza kutanuka kibiashara zaidi kama vile kusimamia vilivyo mauzo ya jezi zao ili fedha iingie klabuni, kuwa na kitengo cha masoko kitakachofanya mambo kwa utaalamu na kuangalia kama Yanga inaweza kuuza fulana zenye picha za wachezaji, jezi zikiwemo zenye majina ya wachezaji maarufu zaidi.

Yanga inaweza ikaingiza kipato kikubwa hata kabla ya viingilio vya uwanjani au fedha za runinga. Lakini inaonekana kila kitu kinakwenda kwa kufuata mazoea, kitu ambacho si sahihi pia ni tatizo.

Yanga iko kwenye bahari ya utajiri, kinachotakiwa ni ubunifu. Hivyo uongozi wa Yanga unatakiwa kubadilisha mambo ili kwenda kisasa na kitaalamu zaidi ili kuondokana na maisha ya enzi zile yalizozidumaza klabu hizo maarufu ambazo majina yake yamebaki kuendelea makubwa, lakini hazina kitu.