RAGE APEWA SIKU MOJA AJIUZULU, LA SIVYO MAANDAMANO HADI BUNGENI

Uongozi wa Tawi la Simba la Mpira Pesa, lililopo Magomeni Mikumi jijini Dar, umempa siku moja, yaani hadi kufikia kesho Jumamosi, Mwenyekiti wa Simba SC, Ismail Aden Rage, awe amejiuzulu wadhifa wake kwa kile walichosema hawana imani naye tena.

Akizungumza jijini Dar es Salaam jana, mwenyekiti wa tawi hilo, Masoud Hassan ‘Ustaadh’, mwenye kadi namba 536, aliainisha makosa matatu muhimu yanayomkabili Rage ya kukiuka katiba ya klabu yao pamoja na ile ya Shirikisho la Soka Tanzania (TFF), hali inayoiweka Simba katika hali ya sintofahamu mpaka sasa.

Alisema kuwa, kama Rage asipojiuzulu hadi kufikia kesho, wanachama wote wa tawi hilo wataandamana hadi bungeni mjini Dodoma kumshtaki kwa Spika wa Bunge.

Aliyataja makosa hayo kuwa ni kudharau tamko la TFF lililomtaka kuitisha mkutano mkuu wa dharura ndani ya siku 14 ambazo zinakwisha leo Ijumaa, kumuingiza Michael Wambura kwenye Kamati ya Utendaji ya Simba kinyume na katiba na kugomea kuitisha mkutano mkuu wa dharura wa klabu uliokuwa ufanyike Desemba, mwaka huu.

“Mpira Pesa tumechoshwa na Rage na hali inavyoondelea anataka kuihatarisha klabu yetu, tunamuomba kiungwana kufikia Jumamosi (kesho) awe amejiuzulu, vinginevyo Jumatatu tumepanga kuandamana kwenda bungeni kumshitaki kwa kiongozi wake wa bunge, Anna Makinda,” alisema.