IDDI PAZI KOCHA MPYA WA MAKIPA SIMBA

IDDI PAZI AKIWA NA BLOGA, LE MUTUZ

Simba imeingia mkataba na kocha mwingine msaidizi, Idd Pazzi ambapo sasa ni maalum kwa kazi ya kuwanoa makipa.

 Kaimu Makamu Mwenyekiti wa Simba, Swedi Nkwabi alisema kufuatia mazungumzo aliyoyafanya na Pazzi, maarufu kwa jina la ‘Faza’, yaliyochukua takribani siku nne, wamekubaliana na kocha huyo na kufanikiwa kumsainisha mkataba wa miezi sita.

“Tumekubaliana naye na sasa ni kocha wetu akichukua nafasi ya James Kisaka, tumeingia naye mkataba wa miezi sita na kazi ataanza mara moja leo (jana) jioni akiwa na kocha mkuu Zdravok Logarusic na msaidizi wake, Selemani Matola,” alisema Nkwabi.

Kufuatia kauli hiyo ya Nkwabi, Championi Ijumaa lilimsaka Pazzi katika kujua ukweli wa taarifa hizo, ambapo alikiri kumalizana na Simba huku akisema maamuzi hayo hayakuwa rahisi kutokana na timu yake ya zamani ya Ashanti kuonyesha bado ilikuwa ikimhitaji.