OKWI AFUNGUKA, ASEMA ANAVYOUMIA MOYONI

SIKU ALIPOPOKELEWA NA MASHABIKI

Kiungo  mshambuliaji mwenye kasi, Emmanuel Okwi, amesema anaumia kuona anakaa nje wakati timu yake ikipambana uwanjani.

Okwi, raia wa Uganda, amesema ana hamu kubwa ya kuitumikia Yanga ambayo ina majukumu ya kutetea ubingwa na kufanya vizuri kwenye Ligi ya Mabingwa Afrika.

Okwi amesema anatamani kuungana na wenzake na kupambana kwa ajili ya Yanga.

“Nasikia vibaya, naumia sana moyoni kwangu kuona nimekaa tu wakati nilitaka kucheza. Naupenda mpira, achana tu na kazi lakini ndiyo mchezo ninaoupenda.

“Nataka kucheza, nataka kuungana na wenzangu kuitumikia Yanga. Ndiyo maana nina hamu kuona mambo haya yanaisha mapema,” alisema.

Okwi ambaye usajili wake umesimamishwa na Shirikisho la Soka Tanzania (Fifa) hadi litakapopata uhakika kutoka kwa lile la kimataifa (Fifa), amekuwa akishuhudia mechi za Yanga akiwa jukwaani.

Mganda huyo aliyewahi kuichezea Simba, amekuwa akiendelea na mazoezi na hivi karibuni aliungana na wenzake kambini Bagamoyo, lakini kuhusu kucheza ataendelea kusubiri kutoka TFF ambayo inasubiri kutoka Fifa.