SIMBA: SISI KIMYA TUNASUBIRI MAMILIONI YETU YA KAPOMBE

Klabu ya Simba SC, imesema inasubiria mamilioni ya fedha kutoka kwa Klabu ya AS Cannes ya Ufaransa kutokana na mauzo ya Shomari Kapombe kwa Azam FC.

Simba ilimpeleka nyota huyo Ufaransa mwaka jana, kwa makubaliano maalum, kuwa iwapo timu hiyo itafanikiwa kumuuza nyota huyo ndani ya miaka mitatu, basi wataambulia asilimia 40 za mauzo hayo huku 40 nyingine zikiliwa na Cannes wakati 20 zitakwenda kwa wakala.

Azam kupitia kwa Katibu Mkuu, Idrissa Nassor, imekuwa wazi kwa vyombo vya habari kwa kusema imemalizana na Cannes na kuongeza kuwa, Kapombe atavaa uzi wa Azam msimu ujao.

Hata hivyo, Azam wamekuwa wagumu kuweka bayana kiasi cha fedha walichomchukua, lakini mazungumzo yaliyokuwepo pande mbili, ni Azam kutoa kitita cha euro 70,000, sawa na Sh milioni 147 za Tanzania kama wanataka saini yake. Kwa mantiki hiyo, Simba itachukua kitita cha Sh milioni 58.8 sawa na AS Cannes.

Katibu Mkuu wa Simba, Ezekiel Kamwaga, amesema mchakato wa mauzo ya Kapombe ambapo aliweka bayana kuwa, si mali ya Simba tena kutokana na makubaliano yao, zaidi wanasubiria fedha kutoka kwa ‘madalali’ wao.

“Kapombe siyo mali ya Simba na kama inavyosemekana kuwa Azam wamemalizana na Cannes basi sisi tunasubiria chetu. Unajua Kapombe tulimpeleka kwa makubaliano maalum kwamba iwapo Cannes watapata timu ya kumnunua, Simba itapata asilimia fulani kwenye mauzo hayo.

“Kwa hiyo kama ameenda Azam nafikiri ni wakati wa kudai chetu kule Ufaransa,” alifafanua Kamwaga.

Kapombe amekuwa akijifua na Azam na kupewa jezi namba 30 huku ikidaiwa kuwa uongozi wa Azam umepanga kumpatia gari lenye thamani ya Sh milioni 30.

Wasiwasi ni kwamba, huenda hadithi ikawa kama ile ya Emmanuel Okwi ambaye tangu alipouzwa na Simba kwenda Etoile du Sahel ya Tunisia, bado Wekundu wa Msimbazi hawajapata fedha yoyote hadi leo.