METODO: NDIYO TAIFA STARS IMEANZA NA KUSHINDA, ILA LAZIMA MABADILIKO YAFANYIKE, ZIMBABWE NI WAZITO ZAIDI

NIANZE na kuwapongeza Mbwana Samata na Thomas Ulimwengu kwa kuonyesha uzalendo kutokana na kuwahi kuichezea timu ya taifa, Taifa Stars ikiwa ni siku moja tu baada ya kumaliza kuitumikia TP Mazembe.

TP Mazembe ilikuwa ina kibarua cha mechi ya kimataifa nchini Sudan dhidi ya Al Hilal, mara tu baada ya mechi hiyo, Samata na Ulimwengu walifunga safari haraka kuja nchini kuitumikia Stars na siku iliyofuata, yaani jana, wakaingia uwanjani kupambana.

Waliofika uwanjani au waliofanikiwa kuiona mechi hiyo waliona walivyopambana, hawakuonyesha uchovu au kutegea na badala yake wote wawili walicheza dakika 90. Ni kitu chema na mfano wa kuigwa.

Nikirejea katika kikosi cha Taifa Stars, pongezi kwao kwa ushindi wa bao 1-0 dhidi ya wageni Zimbabwe ambao baada ya siku chache, kikosi chetu kitakuwa ugenini na wenyewe kuwa wenyeji wetu.

Stars inatakiwa sare au ushindi tena ili kupata nafasi ya kuingia kwenye makundi ya kuwania kucheza Kombe la Mataifa Afrika mwakani nchini Morocco.

Pamoja na ushindi wa Stars, hakika sikuvutiwa na namna timu ilivyocheza kwa maana ya kupambana na kuhakikisha tunashinda. Inawezekana wengine wameona sahihi, mimi pamoja na ushindi, niliondoka Uwanja wa Taifa jijini Dar es Salaam nikiwa na hofu.

Kwamba kwa namna tulivyocheza, tutaweza vipi kuwatoa 

Zimbabwe kwao. Jana tulikuwa nyumbani, lakini idadi ya mashambulizi, aina ya uchezaji, Wazimbabwe walionekana utafikiri wako Harare.

Uhodari wa kipa na walinzi na viungo wa ukabaji ulichangia Stars kutoka na ushindi huo mwembamba wa bao 1-0, la sivyo ingekuwa sare au ingewezekana kupoteza kabisa, kitu ambacho kingekuwa kibaya.

Kocha mpya, Mart Nooij huenda asiwe anajua hamu au kiu kuu ya Watanzania katika michuano ya kimataifa. Inaonekana Kombe la Dunia haliko jirani yetu, inakuwa kazi ngumu. Basi si vibaya tukianzia angalau kwenye Kombe la Mataifa Afrika na tunalihitaji.

Hongera Nooij kwa kuanza mechi yako ya mashindano kwa ushindi wa bao 1-0 lakini timu haikucheza na Tanzania ina wachezaji waliokamilika hasa uliokuwa nao katika kikosi cha jana.

Mashambulizi waliyopanga Stars, mengi yaliishia njiani au washambuliaji kulazimisha kupiga mashuti ya mbali kwa kushindwa kuutegua mtego wa Wazimbabwe ambao walitukosa zaidi ya mara tano katika kipindi cha pili tu, tena kwa mashabulizi ya kuwafanya Watanzania waingie katika hofu.

Stars ilikuwa na wachezaji wanaocheza hapa nyumbani, lakini wako wanaocheza kwenye nchi mbalimbali kama Qatar, DR Congo na waliowahi kucheza Ufaransa. Lakini katika mechi ya jana, timu haikuwa imeunganika, haikuwa na ushirikiano sahihi na hakukuwa na mapambano sahihi.

Upangaji wa mashabulizi haukuwa ni ule unaoonekana kuunganika kuanzia katika safu ya ulinzi yakienda yanapanda kwa mpango na mwisho kuwa imara au mashambulizi bora. Tukienda hivyo Harare, tutarejea na aibu.

Pia tatizo jingine lilikuwa ni kiungo, licha ya kuundwa na wachezaji wengi nyota lakini Stars haikuwa imeunganika, walishindwa kuwa mhimili wa mawasiliano na kuifanya timu ipande ikiwa imejikusanya sahihi  kufanya ‘mabaya’ kwa Wazimbabwe.

Hii si dalili nzuri, inaashiria kazi ya Harare itakuwa ni kubwa maradufu na Stars lazima wajipange vilivyo. Nooij lifanyie kazi kwa kuwa Watanzania wamechoka kubahatisha au kusikia ilibaki kidogo tu. Safari hii tunataka kuona timu inafanikiwa, la sivyo kutakuwa hakuna maana ya kufanya mabadiliko kwenye benchi la ufundi.

Muda wa maandalizi utakuwa unatosha kabisa na Nooij na benchi zima la ufundi la Stars litakuwa na muda pia kuangalia nini cha kufanya lakini hata leo mkalale huku mkitambua Watanzania hawataki hadithi tena.