MKATABA WA MINZIRO NA JKT BADO KIDOGO TU

Imeelezwa kuwa kila kitu kipo tayari kwa ajili ya kocha Fred Felix Minziro, kusaini mkataba kwa ajili ya kuinoa JKT Ruvu, msimu ujao, lakini wachezaji wapya wa timu hiyo wakawa kikwazo katika kukamilika kwa zoezi hilo.

Minziro aliyeanza kuinoa JKT kwenye mzunguko wa pili wa ligi akitokea Yanga, ameliambia Championi Jumatano kuwa, tayari ameshaafikiana na uongozi lakini zoezi la kuchuja wachezaji wapya kwa ajili ya msimu ujao limeingilia kati ufanikishwaji wa kusaini mkataba wake huo.

Kwa sasa timu za JKT na Ruvu Shooting, zipo kwenye mchakato wa mchujo na usaili wa wachezaji wenye vipaji na uwezo mzuri watakaoweza kuzitumikia timu hizo msimu ujao.

Kocha huyo alisema kwamba kuhusu kusaini mkataba mpya JKT, hilo halina shida kwa kuwa tayari ameshamalizana na uongozi kila kitu lakini mara baada ya zoezi hilo la mchujo kukamilika basi atasaini mkataba wake huo.

“Kama ni mazungumzo tayari nimeshamalizana na uongozi, kilichobaki sasa ni mimi kutia saini, lakini hili zoezi lilitakiwa kufanyika mapema kama si muingiliano wa programu ya kutafuta wachezaji wapya.

“Zoezi hili likiisha basi mara moja tutakamilisha ishu ya mkataba na kuhusu vijana ni kwamba bado tunaendelea kuwapokea na tutachagua kati ya nane mpaka kumi, kwa watakaoonyesha uwezo mzuri, lakini kama wakikosekana hapa basi tutaangalia njia nyingine ya kufanya usajili,” alisema Minziro.