AVEVA AANZA KAMPENI, AMBAKIZA LOGARUSIC, ATANGAZA MIPANGO

AVEVA (KULIA) AKIZUNGUMZA AKIWA NA DALALI.

Mgombea wa Urais wa Simba, Evans Aveva amesema kuwa kama akifanikiwa kushinda nafasi hiyo katika Uchaguzi Mkuu wa timu hiyo, basi atabakisha Kocha Mkuu wa timu hiyo Mcroatia, Zdravko Logarusic.

Kauli hiyo ameitoa jana alipofungua kampeni za uchaguzi wa klabu hiyo unaotarajiwa kufanyika Jumapili hii kwenye Ukumbi wa Police Officers Mess Oysterbay jijini Dar es Salaam.

Akizungumza jijini Dar es Salaam, Aveva alisema ni ngumu kwa timu yao kumuacha kocha wenye mipango kwa hofu ya kukivuruga kikosi chao.

“Hatutamuacha Logarusic na badala yake tutaendelea naye katika msimu ujao wa ligi kuu, hatuwezi kumbadili kocha katika kipindi hichi ambacho tunakiboresha kikosi chetu.

“Hivyo ni vyema tutakaendelea kwa ajili ya msimu ujao, hata ukiangalia usajili wote tunaoufanya tunatumia ripoti aliyoikabidhi kwenye kamati ya utendaji,”alisema Aveva.

Aidha katika hatua nyingine Aveva alisema, kama akifanikiwa kuwa rais, basi atahakikisha analiboresha jengo lao la klabu lililopo mtaa wa Msimbazi na Kariakoo ili liwe la kisasa liendane na hadhi ya klabu yao.

Aidha, Aveva amesema anataka Simba kufanya mambo yake kwa kisasa.

Akasisitiza kuwa katika mambo ya kisasa moja ni suala la usajili ambalo litakuwa katika mpangilio.

"Simba sasa haijashiriki michuano ya kimataifa kwa misimu miwili, hivyo lazima kufanya mambo kitaalamu zaidi, tujipange na kuhakikisha tunashiriki michuano ya kimataifa.

"Simba ndiyo timu yenye mafanikio zaidi katika ngazi ya kimataifa, hivyo lazima niirudishe katika kiwango na haitakuwa kazi lahisi lakini nitapambana," alisema Aveva ambaye alikuwa ameongozana na Mwenyekiti wa zamani wa Simba, Hassan Dalali.

Aveva anagombea nafasi ya urais dhidi ya Andrew Tupa ambaye amekuwa kimyakimya.