BRAZUKA YATANGAZA WASHINDI WAKE

Kampeni ya shindano la kwenda nchini Brazil kushuhudia fainali ya Kombe la Dunia inayojulikana kwa jina la Brazuka imepata washindi nane wa awali ambao jana walikabidhiwa zawadi zao.

Zawadi walizopewa washindi hao kwenye hafla fupi iliyofanyika katika Ukumbi wa Esacape One, Kawe jijini Dar ilikuwa ni pamoja na jezi mpya za timu za taifa zitakazotumika kwenye michuano hiyo, fedha taslimu shilingi 50,000 na simu.

MULLY AKIKABIDHI JEZI

Washindi hao waliohudhuria na kukabidhiwa zawadi hizo walikuwa Rose Kyaso, Isihaka Masheu, Emmnauel Mkengere na Eric Vemberini na walioshindwa kuhudhuria kutokana na udhuru maalum walioutoa ni pamoja na Ramson Waruto, Alfred Ngonya, Hawa Said na Pius Joseph.

Mratibu wa kampeni hiyo ya Brazuka, Lumuliko Mengele ‘Mully B’ alisema washindi ambao hawakufika watatumiwa zawadi zao huko walipo kwani wengi  wanaishi mikoani.

“Hawa ni washindi wetu wa awali lakini kutakuwa na wengine watakaopatikana kwenye droo itakayochezeshwa Ijumaa ya tarehe sita ambao watakwenda kushuhudia mechi ya tarehe 16 na pia Jumatatu ya tarehe tisa kutakuwa na droo nyingine pia ya washindi watakaokwenda kushuhudia mechi ya tarehe 21.

“Lakini baadae kutakuwa na droo ya kuwatafuta washindi watakaoshuhudia robo fainali na nusu fainali, tunawataka watu waendelee kushiriki kwa kuwa bado kuna zawadi nyingi na safari kama hizi za Brazil tutawagharamia kila kitu mpaka siku watakayorejea nchini. Unaweza kushiriki kwa kutuma neno Brazuka kwenda namba 15678,” alisema Mully B