SHULE YA SAMATTA, ULIMWENGU HAINA VYETI LAKINI NI BONGE LA FUNDISHO

UKIWA muoga katika nchi hii hasa katika masuala ya soka, basi utaishi umefunga mdomo milele kwa lengo moja tu, kila mtu anataka umfurahishe yeye.

Si rahisi kumfurahisha kila mmoja lakini si vizuri kufanya kazi hasa ya kitaaluma kwa ajili ya kuwafurahisha watu. Kama unapenda hivyo, vizuri kuwa mwanamuziki au muigizaji kwa kuwa wanaigiza fedha kwa ajili ya kufurahisha watu.

Soka ya Tanzania imejaa wanafiki wengi, watu wanaoangalia maslahi yao na wanaochukia wanaosema ukweli. Mifano iko mingi sana lakini huenda kunaanza kuibuka vijana wadogo wanaotoa masomo na sasa yanapaswa kufuatwa na watu wazima.

Hivi karibuni washambuliaji wawili wa TP Mazembe ya Jamhuri ya Kidemokrasia ya Congo (DR Congo), Mbwana Samatta na mshikaji wake, Thomas Ulimwengu waliamua kupanda ndege hadi mkoani Mwanza kwenda kumjulia hali kocha msaidizi wa zamani wa Taifa Stars, Slyvestre Marsh.

Marsh amekuwa mgonjwa kwa zaidi ya miezi mitano sasa, alisafirishwa hadi jijini Dar es Salaam kwa ajili ya kupata matibabu, lakini baadaye amerejea Mwanza ambako anaendelea kupata matibabu.

Kabla ya hapo, kulikuwa na hali ya kumtelekeza, gazeti hili la Championi likafuatilia, likaandika na picha zikapigwa waandishi wake wakiwa wodini na Marsh, ilikuwa kwenye Hospitali ya Taifa ya Muhimbili.

Marsh alikuwa amelazwa kwenye wodi ya kawaida, Championi likaeleza mazingira ukizingatia yeye alikuwa mwalimu wa Taifa Stars. Siku chache baadaye, TFF ikaibuka na kufafanua jambo hilo, huku ikisisitiza aliletwa Dar es Salaam na rais wa shirikisho hilo.

Lakini haikufafanua wodi anayokaa, haikufafanua vipi hakukuwa na kiongozi aliyefika pale hospitalini kwa zaidi ya siku nne na hata rais wao pia hakuwa amefika! Lakini mwisho, akahamishwa wodi na matibabu yake yakaanza kufuatiliwa kwa ukaribu kabisa.

Baada ya Marsh kurudishwa nyumbani kwake Mwanza, tunarudi nyuma kama Championi lilivyoandika. Nani tena aliwahi kwenda kumjulia hali au kufuatilia kwa ukaribu kinachoendelea? Jibu hakuna.

Lakini Samatta na Ulimwengu wameonyesha uungwana ambao sasa unawagusa wengi, unaweza kuliita darasa na watu hata wale wanaowazidi umri wanapaswa kujifunza kupitia vijana hao.

Marsh yuko Mwanza, wao wanafanya kazi DR Congo. Lakini baada ya kufika nchini wamefanya safari ya kwenda katika jiji hilo la pili kwa ukubwa kwenda kumuona kocha wao tena Ulimwengu akasisitiza kuwa Marsh alikuwa akimpa mazoezi peke yake ili kuhakikisha anakuwa fiti.

Wachezaji wa Mwanza mlifika kumuona Marsh, kwa mliofanya hivyo huo ni uungwana. Ambao hamjafanya hivyo mtafakari, lakini je, wachezaji wengine wa Taifa Stars ambao mlifanya kazi na Marsh ambao mnaishi hapa nchini mmewahi kwenda kumsalimia au kumpa pole?

Kama haujafanya basi lazima ujifunze kwamba Samatta na Ulimwengu, licha ya kuwa na mafanikio, mfano hivi; majina makubwa, wanalipwa fedha nyingi kuliko wachezaji karibu wote wa hapa nchini, lakini bado wamekumbuka suala la ubinadamu.

Vipi wewe ambaye jina lako halina ukubwa kama la kwao, usiye na mshahara mzuri kama wao, lakini bado haukumbuki mateso ya mwalimu wako au mtu uliyewahi kufanya naye kazi.

Ubinadamu ni msingi, hata uwe na uwezo wa vitu vingi sana, ubinadamu unabaki kuwa muongozo wa mambo mengi sana ya msingi na moja ni kama hilo la Marsh ambalo ni mfano na funzo, shule ambayo haina ada lakini ukijifunza utahitimu na kupata cheti kitakachokusaidia mbele.

Hongereni Samatta, Ulimwengu. Wengine liwe somo.