MBRAZIL JAJA KILA KITU SAFI, YANGA SASA KUINGIA NAYE MKATABA

Habari kutoka ndani ya Yanga zinaeleza Mbrazil,Genilson Santana Santos ‘Jaja’,  atasaini mkataba wa miaka miwili kuichezea Yanga.

Imeelezwa kwa kuwa Jaja ni pendeezo la Kocha Mkuu wa Yanga, hakutakuwa na haja ya kumfanyia majaribio, badala yake ni kusaini na kuanza kujifua.

Taarifa iliyoandikwa na gazeti maarufu la michezo nchini la Championi kuhusiana na Jaja, ilieleza hivi:

Jaja ambaye anasifika kwa mashuti, pasi zinazozaa mabao, lakini amefunga zaidi ya mabao kumi akiwa nje ya 18, maana yake akiwa fiti, akazoea mazingira, wapinzani wakubwa wa Yanga, yaani Simba na Azam FC, watakuwa katika wakati mgumu.

Hali inaonyesha kuwa Jaja atachukua nafasi ya Emmanuel Okwi ambaye ameonekana kuukoroga uongozi wa Yanga mwishoni mwa msimu uliopita kutokana na kutoroka kambini na kususa mechi za mwisho za ligi.

Katibu Mkuu wa Yanga, amethibitisha ujio wa Jaja lakini akakataa kulizungumzia suala la nafasi ya Okwi.

“Kweli huyo mchezaji anayeitwa Jaja anakuja, nafikiri litakuwa ni suala la kocha kama ataridhika naye baada ya majaribio, basi usajili utafuatia.

“Siwezi kusema ni Jumanne au Jumatano, lakini ndani ya siku hizo mbili tunaamini atakuwa ametua nchini,” alisema Njovu na kuongeza.

“Kuhusiana na kuchukua nafasi ya Okwi au mchezaji mwingine, hilo tuliache kwa wanaohusika na usajili, ukifika wakati wataluzungumzia.”

Pamoja na Njovu kutotaka kulizungumzia hilo, lakini taarifa zinasisitiza Okwi ndiye aliyekalia kuti kavu zaidi kutokana na kuwasumbua Yanga, kitu ambacho kinaweza kusababisha mkataba wake kuvunjwa.

Yanga haina ujanja, lazima italazimika kutema baadhi ya wachezaji wake wa kigeni ili kutoa nafasi kwa wageni Wabrazil wawili, Coutinho na Jaja na inaonekana Haruna Niyonzima na Mbuyu Twite (Rwanda) na Hamis Kiiza (Uganda) ndiyo wenye nafasi ya kuunda nafasi tano ya wachezaji wa kimataifa wakiwa na Wabrazil hao.

Jaja ataunga na Wabrazil wengine watatu ambao ni Kocha Marcio Maximo, msaidizi wake Leonaldo Neiva na kiungo mshambuliaji Andrey Coutinho ambaye ameanza mazoezi na Yanga tayari.

 Uongozi wa Yanga umeamua kuimarisha benchi lake la ufundi, pia kuongeza wachezaji wa kimataifa ili kuhakikisha inafanya vizuri msimu ujao ikiwa ni pamoja na michuano ya kimataifa.