SIKIA MKWALA WA LOGARUSIC KWA MARCIO MAXIMO

Kocha Mkuu wa Simba, Zdravko Logarusic amesema atasikia faraja kuifunga Yanga ikiwa chini ya kocha wao mpya, Marcio Maximo ili kulipa kisasi cha Brazil kuidhulumu Croatia katika Kombe la Dunia.

Brazil iliifunga Croatia mabao 3-1 katika mechi ya Kombe la Dunia hatua ya makundi, lakini penalti iliyozaa bao la pili ilionekana kuwa na utata na Logarusic amekuwa akilalamika kuwa Brazil walibebwa na mwamuzi Yuichi Nishimura kutoka Japan.

MAXIMO

Logarusic maarufu kama Loga, amesema anaamini siku watakapocheza na Yanga, Maximo hatasamilika, labda Shirikisho la Soka Tanzania (TFF), liamue kuleta mwamuzi Mjapani ambaye atakuwa tayari kuibeba Yanga kwa kuwa inafundishwa na Mbrazil.

“Nimesikia sana kuhusiana na Maximo,” alisema Loga kutoa kwao Croatia. “Lakini sitaki kuingilia kinachohusiana na Yanga kwa kuwa wanafanya yao na sisi Simba tutafanya yetu.

“Ila ikifika siku tunakutana na Yanga, nitafanya kila linalowezekana tushinde, itakuwa furaha kwangu kwa mambo mawili. Kwanza nimefanya kazi yangu vizuri, pili nimemshinda kocha kutoka Brazil ambaye timu yake iliidhulumu Croatia kwa kuwa ni nwenyeji wa Kombe la Dunia.”

Loga amesema amekuwa akifuatilia kila kitu kinachoendelea katika soka nchini licha ya kuwa yuko kwao Croatia.

“Kila kitu najua, nafuatilia kwa ukaribu sana kupitia mitandao. Kuhusiana na suala la kurudi Tanzania, nafikiri itakuwa Jumatatu, bado nilikuwa nasubiri wanitumie tiketi.

“Baada ya kufika nitahitaji muda wa saa 24 kupumzika kabla ya kuanza kazi, kama nitafika Jumatatu, basi mazoezi nitaanza Jumatano,” alisema Logarusic.

Kocha huyo wa zamani wa Gor Mahia ya Kenya, amesema ana imani kubwa chini ya uongozi mpya wa Evans Aveva, Simba ina nafasi ya kufanya vziuri zaidi na kubeba ubingwa.