LOGA AMKARIBISHA MRUNDI WA IVORY COAST NA MAJUKUMU

Kocha Mkuu wa Simba, Mcroatia, Zdravko Logarusic, amemkaribisha nyota mpya wa timu hiyo, Mrundi, Pierre Kwizera na kumkabidhi kazi tatu maalum kikosini.

Kwizera, raia wa Burundi, ambaye alitua nchini Ijumaa iliyopita akitokea Ivory Coast alipokuwa akicheza soka la kulipwa katika Klabu ya Afad, tayari ameshaanza kazi kikosini hapo.

Baada ya kutua nchini, moja kwa moja nyota huyo jioni alitinga mazoezini katika Uwanja wa Ununio Boko ambapo alikutana na Logarusic na kumpatia kazi hizo.

Loga alimtaka Kwizera kufanya mambo matatu makuu; moja, kuhakikisha anakuwa miongoni mwa wachezaji tegemeo katika kikosi cha Simba msimu ujao kama mchezaji wa kimataifa. Pili, kuhakikisha Simba inatwaa mataji mbalimbali likiwemo lile la Ligi Kuu Bara na tatu ni kuhakikisha anaisaidia klabu kujiingizia kipato kikubwa kupitia miguu yake.

Kuhusiana na hilo, Logarusic maarufu kama Loga, alisema kuwa kufanya vema kwa Kwizera kutatoa hamasa kwa mashabiki kujitokeza kwa wingi viwanjani kuishuhudia timu yao, lakini pia mauzo ya jezi na vifaa mbalimbai vya jina la Kwizera na Simba kwa jumla vitanunuliwa kwa wingi.

“Karibu Simba, licha ya kukaribia lakini kuna mambo muhimu ya kuzingatia kama kweli umekuja kwa nia ya kuitumikia timu hii. Hakikisha unafanya kazi kama mchezaji wa kimataifa, uwe kioo kwa wachezaji uliowakuta hapa.

“Hujaja hapa kwa maslahi ya hela, bali wewe ndiye unategemewa kuhakikisha Simba inapata hela, maana timu yetu haina hela. Kwa hiyo hilo ni miongoni mwa majukumu yako unapokaribishwa Msimbazi,” alisema Loga.