MAJINA YA JAJA, COUTINHO YATUA JIJINI KIGALI

JAJA

Unaweza ukashangazwa na taarifa za washambuliaji wawili wa Yanga namna umaarufu wao unavyozidi kupasua anga katika ukanda wa Afrika Mashariki na Kati.

Ukiachana na hapa nyumbani, Jaja na Coutinho ambao wamesajiliwa na Yanga kwa ajili ya msimu ujao, sasa umaarufu wao unapasua anga nchi Rwanda ambako itafanyika michuano ya Kagame kuanzia Agosti 8.

COUTINHO

Hata hivyo inaonekana Yanga haitawapeleka Wabrazil hao kwenye michuano ya Kagame na badala yake wataendelea kujifua hapa nchini.

Waandishi mbalimbali wa vyombo vya habari wameiambia SALEHJEMBE kwamba Wabrazil hao wanasubiriwa kwa hamu kubwa na mashabiki wa soka nchini Rwanda na hasa wale wa mji wa Kigali.

“Taarifa za Coutinho na Jaja zinazidi kuwa gumzo, unajua watu hawaamini kama Yanga inaweza kuwa imesajili Wabrazil, tena tumeelezwa makocha wawili pia ni Wabrazil,” alisema Olvier Akaliza.

“Kwenye vyombo vya habari wamekuwa wakizungumzia kuhusiana na hilo, utaona umaarufu wa Yanga kwa hapa Kigali umepaa (umepanda) sana kutokana na Haruna (Niyonzima) kuwa mchezaji wa Yanga.

“Hapa Rwanda, Haruna anaheshimika sana. Hivyo wanapenda kujua timu yake inafanya vipi na wengi sana wanaona kama ina Haruna na Wabrazil, basi itachukua kombe.”

Ukiachana na Akaliza, mwandishi mwingine mkongwe nchini Rwanda, Clever Kazungu amesema wengi wanapenda kuwaona Wabrazil hao wa yanga watafanya maajabu yapi.

“Unajua Wabrazil kuja kucheza Afrika tena kwenye ukanda wetu, tayari imezua mjadala, wengine wanasema watakuwa si wale wenye kiwango cha juu, wengine wanaona ndiyo mapinduzi ya soka.

“Hivyo wanasubiriwa hapa Kigali kwa hamu na kama kweli wakija, basi mechi za Yanga zitakuwa zinajaza watu wengi sana,” alisema Kazungu.

Hata hivyo, inaonekana Jaja na Coutinho watabaki Pemba kambini kwa kuwa kocha Marcio Maximo ametenga vikosi viwili, kimoja kikiwa na vijana na wakongwe wachache kitakwenda Kigali.

Wakongwe ambao wanaonekana wataongozana na Leonaldo Leiva na Shadrack Nsajigwa watakuwa ni Ali Mustapha, Omega Seme, Rajab Zahir, Hussein Javu, Nizar Khalfan na Said Bahanuzi.