KISIGA AANZA KUONYESHA MAMBO, LOGA AMKUBALI

KISIGA

Siku chache tangu aanze mazoezi ya pamoja na Simba, kiungo mchezeshaji mpya wa timu hiyo, Shaaban Kisiga ameonyesha kiwango kikubwa ndani ya mazoezi ya kikosi cha Mcroatia, Zdravko Logarusic.

Kisiga amesaini mkataba wa mwaka mmoja wa kuichezea timu hiyo wiki moja ilizopita akitokea Mtibwa Sugar baada ya mkataba wake kumalizika.

Akiwa mazoezini hapo, Kisiga alionekana kupiga pasi zenye uhakika zilizofika miguuni mwa wachezaji wenzake kwa umakini mkubwa.

Wakati mazoezi hayo yanaendelea, Kisiga alipiga bao kwa shuti kali nje ya mita 20 lililoogonga mwamba wa juu na kujaa wavuni na kumuacha Ivo Mapunda akishangaa mpira ukiingia wavuni.

Kisiga alipofunga bao hilo, kocha wa timu hiyo alionekana kufurahia kabla ya kutikisa kichwa na kumuonyeshea dole kukubali bao hilo.

Wachezaji wengine walionyesha kiwango kikubwa cha kufunga mabao kwa mashuti makali ni kiungo mchezeshaji, Said Ndemla, Donald Mosoti na Awadh Juma.