MAKALA: SHULE YA SAMATTA HAMTAIKWEPA, INAWAHUSU

Na Saleh Ally

SIKU chache zilizopita, mshambuliaji Mbwana Samatta wa TP Mazembe aliamua kuzungumzia namna ambavyo anaona kikosi cha timu ya soka ya taifa, Taifa Stars kimekuwa kikipata ugumu.

Samatta alisema wachezaji wengi kung’ang’ania kubaki nyumbani, kumekuwa ni tatizo kubwa kwa kikosi hicho na badala yake lingekuwa jambo zuri kama wangekubali kutoka nje kwenda kujifunza zaidi.

Kauli hiyo ya Samatta unaweza kusema imechelewa kwa kweli Taifa Stars imekuwa ikiathirika kwa kiasi kikubwa kutokana na kutegemea wachezaji wengi zaidi wanaocheza nyumbani.

Lakini hakuna ambaye amekuwa tayari kusema hilo, huenda kwa kuwa wengi wanacheza nyumbani au wale wanaocheza nje, wamekuwa wakiamini iwapo watasema hivyo wanaweza kuonekana wanawadharau walio nyumbani.

Ukweli unajenga, ukweli unabadilisha mambo na ndiyo dawa kila kunapokuwa na upungufu kwenye jambo. Kukaa kimya ni kuendelea kukuza tatizo. Hivyo Samatta anaweza akawa shujaa wa kipindi hiki kutokana na kuamua kuvunja ukimya kwa kuwa huo ndiyo ukweli.

Alichokisema Samatta ni shule na huenda wachezaji wengi ambao wako hapa nyumbani wanaweza kujipima au kutafakari alichosema mshambuliaji huyo wa TP Mazembe.

Ukweli kama Tanzania ingekuwa ina wachezaji wengi wanaocheza katika nchi za jirani, Afrika Magharibi, Kaskazini na hata Asia na Ulaya ingesaidia kuleta mabadiliko kuliko kuwa na wengi wanaocheza nyumbani pekee.

Samatta mwenye anaweza kuwa mfano mzuri sana katika hilo. hakuna anayeweza kukataa tena kuwa mshambuliaji huyo na mwenzake Ulimwengu ndiyo tegemeo la ushambuliaji la Taifa Stars.

Leo kama Ulimwengu na Samatta hawapo, kila mmoja atakwenda uwanjani na hofu kwamba nani ataleta kashkash au kufunga mabao. Kweli Taifa Stars ni timu, lakini umahiri wa vijana hao wawili, umetengenisha mafuta na maji na uwezo ndiyo unawafanya kila mmoja awaamini.

Ukweli Samatta na Ulimwengu hawajaujenga uwezo huo kupitia kwa waganga wa kienyeji, badala yake mambo matatu makubwa. Kwanza kujiamini, pili kujaribu na tatu nia ya kuamini wanaweza kufanya, wakaingia kwenye ushindani.

Samatta si mchezaji wa muda mrefu, ukihesabu miaka aliyochipukia Mbagala Marketi iliyokuja kuwa Afrika Lyon, muda mchache aliocheza Simba na sasa tegemeo la Taifa Stars na klabu kubwa kama ya TP Mazembe utaona alijiamini, akajaribu kusonga mbele na sasa yuko anapambana kwenye ushindani.

Ndiyo, yuko kwenye ushindani kama Ulimwengu ambaye alikuzwa pale kwenye kituo cha vijana cha TFF. 

Akajaribu kwenda Sweden kabla ya kuuzwa TP Mazembe. Leo wawili hao wanafanikiwa kucheza Mazembe yenye mafowadi saba kutoka nchi za Zambia, DR Congo na Ghana nab ado wanapata nafasi.

Ushindani wanaoupata TP Mazembe ndiyo unaowafanya Ulimwengu na Samatta waendelee kuimarika. Ukubwa wa timu hiyo ya DR Congo, unawapa nafasi ya kushiriki michuano mikubwa ya kimataifa mara kwa mara kuliko wachezaji wengine wa Tanzania.

Kauli ya Samatta, kama kungekuwa na wengine watano wanaopata changamoto kama wanazopata wao wakiwa na TP Mazembe, basi Stars ingekuwa imara zaidi kwa kuwa kungekuwa na wengi walioimarika na wanaoweza kuisaidia zaidi.

Hakuna maana waliopo sasa wanadharaulika, lakini hakuna ubishi kucheza ugenini kuna ushindani na majaribu mengi ambayo kama mchezaji yuko tayari kuingia kwenye ushindani, basi anaimarika zaidi.

Tabia ya kuridhika na wanachopata hapa nyumbani, au kuona Yanga, Simba na Azam FC ndiyo mwisho wa safari ni kujidumaza. Badala yake Samatta na Ulimwengu wanaweza kutumiwa kama mfano mzuri wa hivi karibuni wa wachezaji wa hapa nyumbani kukubali changamoto.

Kama vipaji na uwezo wa juu, wachezaji wengi wa hapa nyumbani ni bora hata kuliko wale wa Zambia, DR Congo, Rwanda, Uganda, Kenya na kwingineko. Tatizo moja tu, hamko tayari kuukabili ushindani, halafu ni waoga ile mbaya!