KISIGA AMWAGA CHOZI, KISA KUMKOSA KIONGERA

KISIGA AKIWA KAZINI...

Kiungo wa Simba, Shabani Kisiga, amesikitishwa na kitendo cha kumkosa kiungo mwenzake Paul Kiongera na juzi Jumamosi alimwaga machozi hadharani mbele ya kocha wake, Patrick Phiri.

Kisiga, aliyetua Simba akitokea Mtibwa Sugar, anaamini kama Kiongera angekuwepo kwenye kikosi cha Simba kwa sasa, safu yao ya ushambuliaji ingekuwa na makali yasiyozuilika. Kiongera atakuwa nje ya uwanja kwa zaidi ya wiki nane akisumbuliwa na goti.

 Simba tayari imeshapata sare mbili katika michezo miwili ya mwanzo kwenye Ligi Kuu Bara ikiwa imejikusanyia pointi mbili tu.

Mkongwe huyo alisema ingawa kikosi hicho kina wachezaji wengi, anaumia kuona wachezaji wenzake wanapata majeraha mapema.

 “Kutupwa nje kwa Kiongera si jambo zuri lakini hatuwezi kuzuia, ni kwa sababu ya majeraha, tulitamani kuwa naye lakini bado kuna wachezaji wengi ambao wataziba nafasi yake hiyo,” alisema Kisiga.

Juzi Jumamosi Kisiga alitokwa na machozi mbele ya Phiri baada ya Simba kulazimishwa sare na Polisi Morogoro kwenye Uwanja wa Taifa, Dar.

Alipoulizwa baadaye, kiungo huyo ambaye ni mtaalamu wa kupiga pasi zenye macho, alisema: “Mtu yeyote mwenye kutaka mafanikio pindi mambo yake yanapokwenda ndivyo sivyo lazima aumie, hali hiyo ndiyo niliyonayo mimi kwa sasa.

“Natamani kuiona Simba safari hii inafanya vizuri lakini mambo yakuwa magumu, sijui ni kwa nini lakini sina jinsi, inabidi nikubali matokeo.”

SOURCE: CHAMPIONI