NAJUA MNACHUKIA KUKOSOLEWA, ILA CHONDE CHONDE TFF MSICHOTE FEDHA ZA KLABU WANAZOPEWA NA WADHAMINI

NAAMINI utakuwa umepata taarifa kuhusiana na Shirikisho la Soka Tanzania (TFF) kutaka kupewa asilimia 5 kutoka kwenye fedha ambazo klabu 14 za Ligi Kuu Bara zinapata kutoka kwa wadhamini!

Nilizipata taarifa hizi wiki iliyopita, lakini ilikuwa ni vigumu sana kwangu kuamini kama kweli TFF inaweza ikafanya uamuzi huo.

Nikafanya kazi ya ziata kupata uhakika, ushahidi kuhusiana na suala hilo kama kweli TFF inaweza ikafanya kitendo hicho ambacho kinaweza kuwa sawa na dhuluma.

Uhakika niliupata siku tatu zilizopita kuwa kweli TFF inataka klabu zikatwe asilimia tano kutoka fedha wanazipata kutoka Azam TV na asilimia tano tena kutoka fedha za Vodacom.

Halafu fedha hizo zipelekwe kwenye fungu la maendeleo ya michezo ambalo linatumiwa nashirikisho hilo!

Hili kwangu ni geni, lakini sitaki kusita wala kupindisha mambo, naliita ni dhuluma na kama viongozi wa klabu watakaa kimya, itakuwa ni maajabu ya karne.

TFF wanataka fedha za klabu, kwamba zichukuliwe na kuingizwa kwenye maendeleo ya soka. Bado usisahau klabu zinakatwa mapato kwenye kila mechi na kuna fedha hizo zinakwenda kwenye mfuko huo.

Kama zitakatwa fedha, maana yake ni mara mbili na kwanini TFF iamua kufanya hivyo huku ikijua klabu sasa ndiyo zimeanza kupata ahueni.

TFF inataka izikate klabu fedha ziende kwenye maendeleo ya soka na zaidi kwake huzitumia katika timu za taifa.

Kama utazungumzia udhamini, Taifa Stars ina wadhamini wakubwa tu Kilimanjaro ambao wamekuwa wakitoa kila kitu kwa timu hiyo.

Wakati mwingine nilianza kufikiria huenda TFF imeishiwa fedha kutokana na ile kambi ya Taifa Stars maboresho ambayo sasa haijulikani ilipo wala faida yake ni ipi!

Au pia najiuliza, huenda hao ndiyo wale washauri wa Rais wa TFF, Jamal Malinzi wako kazini na wameibuka na wazo jipya na kuisaidia TFF kujipatia fedha.

Klabu ndiyo zikatwe fedha ziende kwenye shirikisho, badala ya shirikisho ambalo linachuma fedha kutoka kwenye klabu lizisaidie kupata ahueni ya uendeshaji.

Lazima kuwe na uungwana au huruma, kwamba klabu zinahitaji lundo la fedha kwa ajili ya maandalizi ya mechi 26 kwa msimu.

Kambi, kulipa mishahara na uendeshaji wa timu kwa ujumla si jambo dogo. Kuna timu zinatumia hadi zaidi ya Sh milioni 80 kwa mwezi.

Mfano kwa timu za Yanga na Simba ambazo hazina viwanja vyake, ukiweka gharama ya viwanja kwa mwezi, mishahara, posho na uendeshaji, kufikia Sh milioni 100 wala si ishu kubwa.

Hapo ndiyo uungwana wa TFF kama mzazi au kiongozi wa mpira nchini unatakiwa kufanya kazi na si wao tena kuzidi kuzinyonya klabu.

Tayari suala hilo limetoka TFF na kufikishwa kwenye uongozi wa juu wa bodi ya ligi. Nafikiri TFF inapaswa kulipitia hilo upya na kuahirisha inachotaka kukifanya.

Wadhamini wanafaidika kujitangaza kupitia hizo klabu na wala hawajitangazi kupitia TFF wala timu za taifa. Hivyo ziacheni klabu zifaidike na udhamini huo ‘mduchu’ si kuanza kuzipunguzia tena na kutaka kuzinyonya.

Fedha za Fifa  ambazo mnapewa kila mwaka dola 250,000, ukijumlisha zile za udhamini na zile wanazokatwa klabu kupitia mfuko huo wa maendeleo zinawatosha.

Sasa mfanye juhudi za kutafuta wadhamini wa timu za wanawake na zile ambazo hazina udhamini. Tumieni nguvu yenu kubwa kwenye ubunifu wa nini cha kufanya na si kulahisisha tu mambo na kutaka kutumia nguvu kuzinyonya klabu.