NDANDA YAANZA SAFARI KUIFUATA STAND UNITED SHINYANYA

NDANDA

Betram Hamsini, Mtwara

Kikosi cha Ndanda cha mkoani Mtwara, leo Jumatatu kinatarajia kuanza safari ya kwenda mkoani Shinyanga kwa ajili ya mechi yao ya kwanza ya Ligi Kuu Bara dhidi ya Stand United ya mkoani humo.

Ndanda inayodhaminiwa na matairi ya Vee Rubber ambayo juzi jumamosi ilitoka sare ya 0-0 na Simba katika mchezo wa kirafiki ulipigwa kwenye Uwanja wa Nangwanda Sijaona mkoani  hapa, itafungua pazia la Ligi Kuu Bara dhidi ya Stand Jumamosi ijayo kwenye Uwanja wa Kambarage, Shinyanga.

Katibu Mkuu wa klabu hiyo, Selemani Kachele, alisema wanatarajia kuondoka leo kuelekea Shinyanga ambapo wamepeganga kuweka kambi ya muda mfupi mkoani Morogoro.

“Timu inatarajia kuondoka leo kuelekea Shinyanga tayari kwa ajili ya mechi yetu ya kwanza dhidi Stand United ila tumepanga kuweka kambi ya muda mfupi Morogoro na  tutafika huko siku moja kabla ya mechi.

“Kikikosi chetu kipo vizuri kwa ajili ya mapambano ya ligi lakini pia naamini tunaweza kuibuka na ushindi kwa sababu tumefanya maandalizi ya kutosha, ingawa katika mchezo lolote linaweza kutokea,” alisema Kachele.

STAND UNITED SIKU WALIPOINGIA MKATABA NA MATAIRI YA DOUBLE STAR

Stand pia inadhaminiwa na matairi bora ya Double Star na zote zimepanda daraja msimu huu zikitokea daraja la kwanza.