PHIRI ATABAKI ZANZIBAR HADI ATAKAPOKUTANA NA MAXIMO TAIFA

Kocha Mkuu wa Simba, Mzambia, Patrick Phiri, amesema timu yake itaendelea na kambi kisiwani Unguja hadi itakapocheza mchezo wake wa Ligi Kuu Bara dhidi ya Yanga.

Timu hizo zinatarajiwa kukipiga  Oktoba 12, mwaka huu kwenye Uwanja wa Taifa jijini Dar es Salaam.

Phiri alisema timu hiyo itaendelea kuweka kambi ya muda mrefu kisiwani Unguja kwa ajili ya kujiandaa na michezo ya mwanzoni, ukiwemo dhidi ya Yanga.

Phiri alisema kutokana na ugumu wa mechi hiyo, timu hiyo haitarejea mapema Dar es Salaam na badala yake itaendelea kupiga kambi kujiandaa na mchezo huo.

Mzambia huyo aliongeza kuwa, michezo ya kwanza mitatu ya ligi kuu timu hiyo itaenda Dar es Salaam kucheza mechi zake na kurejea Zanzibar kuweka kambi kujiandaa na mechi ya Yanga kabla ya kurejea rasmi.

Aliongeza kuwa, hali hiyo inatokana na ukweli kwamba anahitaji kukaa na timu pamoja kwa muda mrefu ili kutengeneza kikosi bora ambacho kitaleta ushindani wa hali ya juu baada ya kukosa mafanikio kwa muda mrefu.

 “Kama unavyojua timu za Yanga na Simba zinapokutana ushindani huwa ni mkubwa sana, hivyo timu yangu itaenda Dar es Salaam na kurejea Zanzibar kujiandaa na ligi,” alisema Phiri.

Phiri aliongeza kuwa, hata kama ikitokea timu hiyo itapata mechi za kirafiki nje ya Kisiwa cha Unguja, itatoka kwenda kucheza kisha kurejea tena kisiwani hapa kwa ajili ya kuendelea na mazoezi yake.