MAXIMO AMUONGEZEA MZIGO ZAIDI KIUNGO WAKE COUTINHO

Kocha Mkuu wa Yanga, Marcio Maximo, amemuongezea majukumu ya uwanjani kiungo wake mshambuliaji, Andrey Coutinho kwenye kikosi chake.

Mchezaji huyo ambaye alikuwa majeruhi kwa muda, alirejea hivi karibuni na kucheza mechi ya kwanza ya ligi kuu dhidi ya JKT Ruvu kwenye Uwanja wa Taifa jijini Dar es Salaam baada ya kupona majeraha ya enka.

Majukumu aliyopewa kiungo huyo ni kumchezesha mshambuliaji wa timu hiyo, Geilson Santos Santana ‘Jaja’ ili apate nafasi ya kufunga.

Tayari Maximo amembadilisha namba Coutinho kutoka kiungo mshambuliaji wa pembeni namba 11 na kumtumia kuwa mshambuliaji wa pili, namba 10.

Awali, kocha huyo alikuwa akimtumia kiungo mshambuliaji mwenye kasi, Mrisho Ngassa kucheza namba 10 kuanzia mechi za kirafiki na baadhi za ligi kuu.

“Ni maboresho tu niliyoyafanya kwenye kikosi, kila siku ninajaribu kutengeneza kombisheni tofauti za wachezaji kwenye timu ili tupate matokeo mazuri,” alisema Maximo.

Aidha, akizungumzia kumchezesha Coutinho kwa wastani wa dakika 60 katika mechi mbili zilizopita, Maximo alifunguka: “Nalazimika kumpa dakika 60 kwa sababu bado hajawa fiti kwa asilimia 100.”