YANGA WAWALINDA WACHEZAJI WAO TAIFA STARS

Wachezaji saba wa Yanga waliopo kwenye kambi ya timu ya taifa ya Tanzania, Taifa Stars, inayojiandaa na mchezo wa kirafiki dhidi ya Benin, wamewekewa ulinzi mkali pindi wanapokuwa mazoezini kwa kuhofia kuhujumiwa kutokana na kuwa wiki ijayo watakuwa na kibarua kikubwa cha kuikabili Simba.

Taarifa za uhakika kutoka ndani ya Shirikisho la Soka Tanzania (TFF) zinasema kuwa awali uongozi wa Yanga uliwawekea ngumu wachezaji hao kujiunga na timu hiyo, sababu ikiwa ni hiyohiyo, lakini licha ya kuwaruhusu umetaka wachezaji wao walindwe na kuwe na uangalizi wa karibu kutokana na hofu hiyo ya pambano la watani

Kwenye mazoezi ya Stars, jana asubuhi katika Viwanja vya Gymkhana jijini Dar, ambapo lilishuhudia ulinzi mkali kiasi kwamba waandishi wa habari walizuiwa kusogelea kwenye uwanja wa mazoezi mpaka walipopata ruhusa kutoka kwa uongozi.

“Wanawapa ulinzi mkali sana, wanahofia mechi yao ya Simba na hiyo ndiyo sababu kubwa,” kilisema chanzo kutoka kwenye kambi ya timu hiyo ya taifa.

Wachezaji wa Yanga waliopo Stars ni Deogratius Munishi ‘Dida’, Nadir Haroub ‘Cannavaro’, Edward Charles, Oscar Joshua, Kelvin Yondani, Mrisho Ngassa na Simon Msuva.