SABA WA STARS WAMCHANGANYA MAXIMO KUJIANDAA DHIDI YA SIMBA

Kutokana na wachezaji wake saba kuteuliwa kwenye kikosi cha timu ya taifa, Taifa Stars inayoivaa Benin, kesho, Kocha Mkuu wa Yanga, Marcio Maximo ameonekana kushindwa kuendelea na programu nzima kama alivyokuwa akitaka.

Hata hivyo hana ujanja kwa kuwa sheria chini ya Shirikisho la Soka la Kimataifa (Fifa), zinaruhusu wachezaji hao kutumiwa na timu ya taifa, kumbuka hata yeye akiwa kocha wa Stars, alifanya hivyo.

Yanga inatarajiwa kukipiga dhidi ya Simba kwenye Uwanja wa Taifa, Oktoba 18, mwaka huu, ambapo kocha huyo raia wa Brazil, jana alionekana kuwa katika wakati mgumu kwenye mazoezi ya timu yake na kujikuta muda mwingi akiwa nje ya uwanja.

Inakumbuka kuwa, Yanga ilitaka kuwazuia wachezaji wake hao kujiunga na Stars, lakini Shirikisho la Soka la Tanzania (TFF) likaweka ngumu, hivyo Wanajangwani hao kuamua kuwa wadogo.

Katika mazoezi ya Yanga yanayofanyika Uwanja wa Shule ya Loyola jijini, Maximo alijikuta akiwa na wachezaji wachache ambao amekuwa akiwatumia kwenye kikosi cha kwanza na hivyo kutumia muda mwingi katika mazoezi ya viungo kisha baadaye kuwapanga kucheza ‘full game’.

Maximo amekuwa na kawaida ya kutoa mbinu mbalimbali katika mazoezi yake, lakini jana hali ilikuwa tofauti na kumfanya aonekane mpole kwa muda mwingi.

Wachezaji wa Yanga waliojiunga Stars ni; Deogratius Munish ‘Dida’, Oscar Joshua, Edward Charles, Kelvin Yondani, Nadir Haroub ‘Cannavaro’, Mrisho Ngassa ‘Uncle’ na Simon Msuva.

Wakati huohuo, Maximo ameonyesha kuwashtukia Simba na kutamka kuwa hataki mchezaji wake yeyote kuidharau timu hiyo ambayo imepata sare katika mechi tatu mfululizo.

“Nimeshawatahadharisha wachezaji wangu mapema kuelekea kwenye mechi ya Simba kuwa wanatakiwa kuwa makini na hawatakiwi kuidharau Simba kutokana na matokeo yao,” alisema Maximo.