SIMBA SASA YAAMUA KURUDI KWA MUSOTI, YEYE ASEMA SIO SASA

MUSOTI WAKATI AKIWA MAZOEZINI SIMBA. KULIA NI SHABANI KISIGA.

Hatimaye Klabu ya Simba imeonyesha kukubali kukaa meza moja na beki Donald Musoti ili kumalizana kwa kilichotokea wiki chache zilizopita, lakini beki huyo raia wa Kenya ameweka ngumu.

Rais wa Simba, Evans Aveva, amesema kuwa wao wapo tayari kukaa na Musoti meza moja ili kuweza kulimaliza lakini majibu waliyoyapata kutoka kwa beki huyo ni kuwa yeye hawezi kuzungumza kwa sasa.

“Musoti bado tunamtambua kuwa ni mchezaji wetu halali kwani bado ana mkataba na Simba, kuhusu suala lake hadi sasa bado linaendelea na hatujapata muafaka, awali tulimwita ili kuweza kumalizana naye lakini alikataa kwa madai kuwa tayari suala hilo ameshalifikisha kwa wakala wake na ndiye mtu tunayetakiwa kufanya naye mazungumzo.

“Kitu kinachotutatiza ni kwamba wakala wake pia ni mgeni, hivyo inakuwa tatizo kumpata lakini kuhusu barua ya Fifa ambayo amedai wanataka kutupatia bado hatujaipata na tunasubiri tuipate ili kuweza kuona kile kilichojili na kutoa majibu kulingana na kile kilichoandikwa,” alisema Aveva na kuongeza:

“Sisi tulikuwa radhi kuendelea naye lakini aliondoka bila ya kutoa taarifa kwa uongozi hivyo ikawa vigumu kukutana naye, tunasubiria barua ili kuweza kukaa naye meza moja na kulimaliza tatizo hili.”

Simba ilimuondoa Musoti dakika za mwisho kwenye majina yake ya usajili na kumuingiza Emmanuel Okwi, mchezaji huyo alilalamika kutotendewa haki na inaelezwa amefikia makubaliano ya kuichezea Tusker ya Kenya.